Pas ndarjes nga jeta të këngëtarit Shpat Kasapi, i cili pësoi arrest kardiak teksa ndodhej në Itali dhe u nda nga jeta në moshën 40 vjeç, rrjetet sociale u mbushën me reagime, komente dhe gjykime të shumta, veçanërisht ndaj Selvijes, partneres së tij dhe nënës së djalit të tyre, Roelit.
Në këtë klimë emocionesh të forta, ku dhimbja shpesh përzihet me kuriozitetin publik, halla e këngëtarit, Flora Kasapi, ka reaguar publikisht gjatë një interviste në emisionin “Living Day”, duke thënë se ndaj Selvijes është bërë “padrejtësi e madhe”.
Ajo theksoi se raporti me figurat publike nuk e justifikon gjyqin kolektiv dhe se askush nuk mund të flasë me siguri për një marrëdhënie pa e njohur realisht nga afër. “Ku e di ti kush është ajo? Ke jetuar me atë? Jo”, u shpreh ajo, duke nënvizuar se zgjedhja e Shpatit për të pasur Selvijen pranë, si partnere dhe si nëna e fëmijës së tij, duhet respektuar.
Në fjalën e saj, Flora Kasapi foli edhe për dimensionin njerëzor të humbjes, duke e përshkruar vdekjen si një çast të papritur e tronditës, për të cilin, sipas saj, nuk ka shpjegime që e lehtësojnë dhimbjen. Ajo u ndal edhe te mënyra si komentohet tragjedia në publik, duke bërë thirrje që tema të tilla të mos kthehen në “gjyqe” dhe “gojë” që ushqehen me thashetheme.
