Presidenti amerikan Donald Trump ka vijuar tonin triumfalist në rrjetet sociale, duke ndarë një tjetër deklaratë për NATO-n, Ukrainën dhe rolin e tij personal në çështjet globale.
Në një postim në platformën X (ish-Twitter), Trump tha se para se të merrte detyrën, vendet aleate të NATO-s kontribuonin vetëm 2% të PBB-së në buxhetin e mbrojtjes dhe “shumica nuk po paguanin fare”.
Sipas kreut të Shtëpisë së Bardhë, falë presionit të tij, kontributet e aleatëve në mbrojtje janë rritur deri në 5% të PBB-së, dhe vendet “po paguajnë menjëherë”, diçka që ai e cilëson si të pabesueshme për shumë prej skeptikëve.
Pretendimi për Ukrainën
Në të njëjtin postim, Trump deklaroi se Moska do ta kishte pushtuar të gjithë Ukrainën nëse ai nuk do të kishte ndërhyrë.
“Pa mua, Rusia do ta kishte marrë gjithë Ukrainën,” shkroi Presidenti amerikan, duke lënë të nënkuptohet se politika e tij ndaj Kremlinit ka qenë vendimtare.
“I vetëm i ndala 8 luftëra”
Trump përsëriti pretendimin e njohur se ka ndalur tetë luftëra, duke thënë se “shpëtoi miliona jetë”.
Ai u ankua edhe për faktin që, sipas tij, bota nuk i ka vlerësuar sa duhet përpjekjet e tij për paqe, duke përmendur Norvegjinë – vend ku akordohet çmimi Nobel për Paqen.
“Megjithëse anëtare e NATO-s, Norvegjia vendosi të mos më jepte Nobel. S’ka rëndësi,” ironizoi ai.
