Një ushtar amerikan i stacionuar në bazën ushtarake të Aviano Air Base po rikuperohet pas një sulmi me thikë të ndodhur javën e kaluar në qytetin Conegliano, në Itali.
Ushtari, 28 vjeç, identiteti i të cilit nuk bëhet publik, ishte jashtë detyrës në momentin e incidentit. Ai u dërgua me urgjencë në një spital lokal, ku mori trajtim mjekësor, ndërsa tashmë ndodhet në shtëpi dhe jashtë rrezikut për jetën. Lajmi raportohet nga Stars and Stripes.
Ngjarja ndodhi në orët e para të mëngjesit të 28 dhjetorit, jashtë një klubi privat në Conegliano. Sipas raportimeve, ushtari ishte i shoqëruar nga një grua shqiptare 37-vjeçare, kur u përball me një grup personash që njiheshin me të. Konflikti verbal ka degjeneruar në përleshje fizike, gjatë së cilës të dy janë plagosur, ndërsa ushtari është goditur me thikë.
Fillimisht u raportua se ai ishte në gjendje kritike, por ndërhyrja e shpejtë mjekësore bëri që gjendja e tij të stabilizohej. Autoritetet italiane kanë identifikuar një të dyshuar përmes pamjeve të kamerave të sigurisë dhe targës së një automjeti, por personi mbetet ende në arrati.
