Protesta e opozitës ka nisur me tensione. Në zonën te Pallati me Shigjeta në Tiranë, ka pasur përplasje mes protestuesve dhe një qytetari i cili ka tentuar të futet me makinë.
Njëri nga protestuesit dhe shoferi i mjetit filluan të përdornin edhe fjalë banale kundrejt njëri-tjetrit, por ishte njëra nga protestueset e cila ju afrua shoferit të mjetit dhe e bindi të mos konfliktoheshin.
Një tjetër përplasje u shënua te mbikalimi i Pallatit me Shigjeta, ku një nënë që shoqëronte fëmijën e saj të sëmurë u ndalua nga turma e protestuesve. Ajo kërkoi me ngulm të hapet rruga, duke theksuar urgjencën për të shkuar në spital.
“Nuk jam e njoftuar fare për këtë. Ju lutem, hapni rrugën, kam fëmijën për spital. Policit i thashë ta hapë rrugën. Po, kam fëmijën për spital, ju lutem”, u shpreh gruaja në mënyrë të përsëritur.
Tensione pati gjithashtu mes kreut të grupit parlamentar të PD-së, Gazment Bardhi, dhe drejtuesve të policisë në terren. Bardhi akuzoi policinë se duhej të merrte masa për të ridrejtuar trafikun, ndërsa theksoi se protesta është një e drejtë kushtetuese.
“Nuk keni fare punë me qytetarët, detyra juaj është të rregulloni trafikun. Nuk kërkohet leje, ka një vendim të Gjykatës Kushtetuese që thotë që në rast të lirisë të tubimit nuk merret leje nga policia, vetëm njoftohet policia. Lëvizjen e qytetarëve po e pengoni ju që nuk keni marrë masa të devijoni trafikun. Unë po flas për ligj dhe kushtetutë. Devijoni trafikun, nëse doni ndihmë ju ndihmojmë ne. Nuk kemi qëllim të pengojmë lëvizjen e qytetarëve, ju keni detyrimin të rregulloni trafikun duke na siguruar një tubim paqësor. Nuk kemi ndërmend të bëjmë akte dhune, siç e dini në çdo tubim ka bllokim të rrugëve, ndaj është policia”, tha Bardhi.
Grumbullimi i militantëve të PD në 5 pika kyçe të kryeqytetit ka shkaktuar kaos në trafik, që gjithsesi ishte i ngarkuar ditën e sotme për shkak të motit të keq me reshje intensive shiu.
Akset e bllokuara janë: “Unaza e Vogël”, “rrethrrotullimi te Zogu i Zi”, ura afër xhamisë në Rrugën e Elbasanit, sheshi “Willson” dhe rruga nga “Pallati me Shigjeta” drejt “Rrugës së Kavajës”.
Ndërkohë mbi 1400 efektivë policie janë në terren për të siguruar mbarëvajtjen e protestës së opozitës që ka nisur në orën 17:00.
