Në mesazhin e tij për Vitin e Ri, lideri i Koresë së Veriut, Kim Jong-un, vlerësoi trupat që po veprojnë në një “tokë të huaj” dhe theksoi atë që e quajti “aleancë të pamposhtur” mes Phenianit dhe Moskës.
Ai iu drejtua njësive të angazhuara në “operacione jashtë vendit”, duke i përgëzuar për mbrojtjen “heroike” të nderit të vendit dhe duke i inkurajuar të tregojnë guxim, duke theksuar se kanë mbështetjen e Koresë së Veriut dhe Rusisë.
Agjencitë e inteligjencës në Korenë e Jugut dhe në vendet perëndimore kanë raportuar se Pheniani ka dërguar mijëra ushtarë për të mbështetur operacionet ushtarake të Rusisë në Ukrainë, konflikt që po zgjat prej gati katër vitesh.
Sipas këtyre burimeve, qindra ushtarë koreano-veriorë janë vrarë dhe mijëra të tjerë janë plagosur. Analistët vlerësojnë se, në këmbim të kësaj mbështetjeje, Koreja e Veriut po përfiton ndihmë financiare dhe materiale nga Moska.
Burime të inteligjencës së Koresë së Jugut kanë raportuar gjithashtu se trupat koreano-veriorë operojnë nën udhëzime jashtëzakonisht të rrepta në fushëbetejë. Kim Jong-un i lavdëroi ushtarët për rolin e tyre në forcimin e lidhjeve me Rusinë dhe i nxiti të luftojnë “për popullin vëllazëror rus”.
Ndërkohë, dy ushtarë koreano-veriorë të kapur nga forcat ukrainase kanë shprehur dëshirën për të nisur një “jetë të re” në Korenë e Jugut. Në një letër, ata falënderuan ata që kontribuuan në lirimin e tyre dhe shprehën shpresën për një fillim të ri, duke theksuar se nuk ndiheshin të vetëm.
Pas një periudhe spekulimesh, Koreja e Veriut konfirmoi zyrtarisht dërgimin e trupave për të mbështetur forcat ruse, përfshirë në rajonin e Kurskut.
Peniani bëri të ditur se ky veprim është ndërmarrë në bazë të traktatit të mbrojtjes së përbashkët të nënshkruar mes dy vendeve në vitin 2024.
Në një takim me një zyrtar të lartë rus në qershor, Kim Jong-un riafirmoi mbështetjen e tij të plotë për luftën e Rusisë kundër Ukrainës.
