Rasmus Højlund ka folur hapur për largimin nga Manchester United dhe kalimin te Napoli, duke theksuar se vendimi nuk erdhi nga dëshira e tij për t’u larguar, por nga mesazhi i qartë që mori në “Old Trafford”: se nuk ishte më pjesë e planeve.
“United ma bëri mjaft të qartë që nuk isha pjesë e planeve për këtë sezon… pa futboll europian dhe me këto rrethana,” ka thënë sulmuesi për Sports Illustrated. “Jam i ri, duhet të luaj futboll dhe për këtë arsye mendova se kjo ishte një mundësi e mirë për mua.”
22-vjeçari, për të cilin United kishte investuar afro 80 milionë euro kur e mori nga Atalanta në verën e 2023-shit, u rikthye në Serie A te Napoli përmes një formule huazimi: 6 milionë euro për huazimin, me opsion blerjeje 44 milionë euro, që kthehet në detyrim nëse Napoli kualifikohet në Champions League.
Højlund zbuloi se sapo dëgjoi interesimin e Napolit, e bëri të qartë se donte vetëm këtë destinacion: “Napoli pa një mundësi për të më marrë dhe sapo e dëgjova interesin e tyre, e bëra shumë të qartë për njerëzit e mi se doja të shkoja vetëm aty.”
Vendimtare, sipas tij, ishte edhe biseda direkte me Antonio Conte: “Ishte një bisedë e shkurtër, por shumë, shumë e mirë. Ai është një trajner i jashtëzakonshëm… Kur të telefonon, thjesht duhet t’i thuash po.”
Në fushë, reagimi i tij me Napolin ka qenë pozitiv: deri tani numëron 7 gola dhe 3 asistime në 19 ndeshje në të gjitha kompeticionet, ndërsa Conte ka folur publikisht për mënyrën se si po e zhvillon lojën e danezit.
Napoli e afroi Højlund si zgjidhje emergjente pas dëmtimit të rëndë të Romelu Lukaku, i cili u la jashtë për rreth katër muaj pas një miqësore para-sezonale. Megjithatë, vetë Højlund pranoi se edhe ideja për të luajtur pranë belgut ishte një motiv i fortë: “Rom është djalë fantastik… e kam pak si idhull. Dua të mësoj prej tij, sepse mund të më japë shumë: gola, lidhjen e lojës dhe gjëra të tilla.”
