Ish-drejtuesi i Policisë së Shtetit, Shemsi Prençi, ka bërë një deklaratë të fortë në lidhje me hetimet e SPAK dhe situatën e dy ministrave të Qeverisë Rama. Sipas Prençit, dy ministra të qeverisë janë përfshirë në dosje të rëndësishme hetimore dhe shumë shpejt do të kërkojnë azil jashtë Shqipërisë, ashtu si ish-zv.kryeministri Arben Ahmetaj.
Prençi tha në një emision se dosjet e hapura nga SPAK përfshijnë edhe biznesmenë të fuqishëm dhe se hetimet janë duke prekur nivele të larta, përfshirë politikanë të shquar. Ai theksoi se, megjithëse SPAK po luan “me vijën e zjarrit”, shpejtësia e hetimit duhet të ishte më e madhe, pasi kjo mund të ndikojë në ndalimin e ikjes të personave të dyshuar, të cilët kanë pasaporta shërbimi dhe mund të kalojnë kufirin pa u regjistruar.
“Dy ministra janë në tratativa për të ikur për të kërkuar azil. Siç iku zv.kryeministri. SPAK duhet t’iu ndalojë daljen jashtë shtetit, por kanë frikë se policia nuk i ndalon dot se kanë pasaporta shërbimi dhe në kufi nuk i regjistrojnë.
Shpejtësia në hetim duhet të ishte më e madhe. Në dy dosje janë të përfshirë oligarkët dhe pastaj SPAK prek vijën e zjarrit. Pasi ka prekur politikanët, por tani…Ditën e të dashuruarve nuk do ta festojnë në liri,” tha Prençi
Në përfundim, Prençi shtoi se dy ministrat janë të lidhur me disa dosje të rëndësishme, përfshirë atë të Elbasanit, pronat e ushtrisë dhe fondet e IPARD 2.
Ai nuk dha më shumë detaje për emra të përveçëm, por mbetet për t’u parë nëse këto deklarata do të rezultojnë të vërteta.
