Agjencia e Ushqimit dhe Veterinarisë e Republikës së Kosovës (AUV) ka njoftuar opinionin publik për një rast të konstatuar të kontaminimit me bakterin Salmonella spp në një ngarkesë të produktit MDM pule të importuar nga Polonia.
Lajmi është bërë i ditur pas njoftimit të pranuar nga Komisioni Evropian përmes Sistemit të Paralajmërimit të Shpejtë për Ushqim (RASFF).
Ngarkesa e mishit të pulës, me prodhues CEDROB S.A., Ubojnia Drobiu Ujazdówek, ishte importuar nga kompania KAJMAK SHPK në Prizren. Gjatë kontrolleve të kryera nga inspektorët e AUV, është vërtetuar prania e salmonelës në një sasi prej 2064 kilogramësh mish pule.
Pas konstatimit të këtij rasti, autoritetet kanë ndërmarrë masa të menjëhershme duke asgjësuar të gjithë produktin e importuar, në përputhje me procedurat ligjore dhe standardet e sigurisë ushqimore.
AUV ka theksuar se po vazhdon të monitorojë situatën me kujdes të shtuar dhe është në bashkëpunim të ngushtë me institucionet vendore dhe ndërkombëtare, si dhe me bizneset që merren me importin e mishit.
Qëllimi i këtij angazhimi është identifikimi dhe parandalimi i rasteve të ngjashme, për të garantuar ushqim të sigurt dhe në përputhje me standardet evropiane.
