Presidenti amerikan, Donald Trump, deklaroi se Shtetet e Bashkuara do të mbajnë ose mund të shesin naftën e sekuestruar nga cisternat që janë kapur pranë bregdetit të Venezuelës, si dhe vetë anijet.
Gjatë një konference për gazetarët në Florida, Trump tha: “Do ta mbajmë. Ndoshta do ta shesim, ndoshta do ta mbajmë. Ndoshta do ta përdorim për Rezervat Strategjike. Po i mbajmë edhe anijet”.
Sekuestrimet janë pjesë e presionit të vazhdueshëm të Washington-it ndaj udhëheqësit venezuelas, Nicolás Maduro, për t’u larguar nga pushteti. Administrata amerikane akuzon Venezuelën se përdor të ardhurat nga nafta për të financuar krimin e lidhur me drogën, ndërsa Caracasi i ka dënuar veprimet si “pirateri”.
Në këtë muaj, Ushtria amerikane ka sekuestruar dy cisterna nafte, përfshirë një të shtunën e kaluar dhe aktualisht ndjek një të tretë, të përshkruar si pjesë e flotës “të errët” të Venezuelës, e cila përdoret për të shmangur sanksionet amerikane.
Trump paralajmëroi gjithashtu se sulmet ushtarake do të vazhdojnë edhe në tokë, duke theksuar: “Nëse ata do të tentojnë të hyjnë në territor, do të kenë probleme të mëdha. Do të shkatërrohen, sepse nuk duam që njerëzit tanë të helmohen”.
Nga ana e tij, Maduro iu përgjigj duke thënë se Trump “do të ishte më mirë të merrej me problemet e ekonomisë dhe shoqërisë së vendit të tij dhe se bota do të ishte më mirë nëse fokusohej në çështjet e brendshme të SHBA-ve”.
Qeveria amerikane ka dyfishuar shpërblimin për informacion që çon në kapjen e Maduron, duke e akuzuar atë si “një nga trafikantët më të mëdhenj të drogës në botë”. Trump ka shpallur qeverinë e Maduron si organizatë terroriste të huaj (FTO) dhe javën e kaluar urdhëroi një “bllokadë” për tankerët e naftës së sanksionuar që hyjnë ose dalin nga Venezuela.
Masat e fundit kanë shkaktuar zemërim të madh në Venezuelë dhe Këshilli i Sigurimit i OKB-së do të mbajë një seancë emergjente për të diskutuar agresionin e SHBA-ve, sipas kërkesës së Qeverisë së Venezuelës.
Në sfond, SHBA-të kanë rritur praninë ushtarake në Paqësor dhe Karaibe, ndërkohë që sulmet ndaj anijeve të dyshuara për trafikun e drogës kanë shkaktuar vdekjen e rreth 100 personave, pa prova publike që ato anije po transportonin drogë.
Ky zhvillim intensifikon tensionet ndërmjet SHBA-ve dhe Venezuelës, duke shënuar një nga momentet më të ndjeshme në marrëdhëniet mes dy vendeve në dekadat e fundit.
