Janë zhvilluar sot dy ndeshjet e fundit të javës së 17-të të Kategorisë Superiore, të cilat sollën ndryshime të rëndësishme në renditje.
Bylisi arriti një fitore të rëndësishme ndaj Elbasanit me rezultatin 3-2, ndërsa përballja mes Tiranës dhe Vllaznisë u mbyll në barazim 1-1, me të dy skuadrat që ndanë nga një pikë.
Pas këtyre rezultateve, Elbasani humb vendin e parë, duke ia lënë kryesimin Egnatias pikërisht në javën e fundit të vitit 2025, ku do të përcaktohet edhe “kampioni i dimrit”. Egnatia tashmë kryeson renditjen me dy pikë më shumë se verdheblutë.
Vllaznia vazhdon të mbetet në vendin e katërt, me një diferencë prej shtatë pikësh nga skuadra kryesuese, duke e bërë më të vështirë ndjekjen e kreut.
Fitorja i ka dhënë oksigjen Bylisit, i cili del nga zona e rrezikut dhe ngjitet mbi Vorën në renditje. Në anën tjetër, Tirana vijon të mbetet në fund të tabelës, duke e komplikuar edhe më shumë situatën e saj në kampionat.
