Autoriteti i Konkurrencës ka njoftuar se ka nisur monitorimin intensiv në terren të çmimeve të produkteve ushqimore të shportës gjatë periudhës së festave të fundvitit. Ky veprim synon të evidentojë dhe parandalojë abuzimet me çmimet nga ana e ndërmarrjeve tregtare, duke garantuar mbrojtjen e konkurrencës dhe interesat e konsumatorëve.
Në një deklaratë për shtyp, Autoriteti bëri të ditur se shkeljet e ligjit nr. 9121/2003 “Për mbrojtjen e konkurrencës” do të ndëshkohen në mënyrë rigoroze. Ligji ndalon çdo marrëveshje që kufizon ose shtrembëron konkurrencën në treg, përfshirë ato që përcaktojnë çmime në mënyrë të padrejtë.
Autoriteti ka paralajmëruar rrjetet tregtare se shkelja e këtij ligji përbën kundërvajtje administrative dhe mund të sanksionohet me gjoba deri në 10% të xhiros së vitit financiar të kaluar.
Në përfundim, Autoriteti siguron qytetarët se çdo tentativë për ngritje artificiale të çmimeve do të hetohet dhe ndëshkohet, duke mbrojtur kështu konsumatorët nga praktikat e padrejta në treg.
Njoftimi i plotë për shtyp:
Autoriteti i Konkurrencës njofton se, në kuadër të angazhimit për mbrojtjen e konkurrencës dhe interesave të konsumatorëve, po ndërmerr të gjitha hapat e nevojshëm duke vënë nën monitorim të menjëhershëm në terren çmimet e produkteve të shportës ushqimore gjatë periudhës së festave të fund vitit, me qëllim evidentimin, parandalimin dhe penalizimin e atyre ndërmarrjeve tregtare të cilat abuzojnë me çmimet në shkelje të ligjit nr. 9121/2003 “Për mbrojtjen e Konkurrencës
Autoriteti i Konkurrencës siguron qytetarët se do të identifikojë dhe ndëshkojë çdo fenomen të mundshëm të ngritjes artificiale të çmimeve që mund të shkaktohet nga praktikat jo të drejta të konkurrencës.
Ligji nr. 9121/2003 “Për mbrojtjen e konkurrencës” ndalon të gjitha marrëveshjet të cilat kanë si objekt ose si pasojë pengimin, kufizimin ose shtrembërimin e konkurrencës në treg, veçanërisht marrëveshjet që caktojnë në mënyrë të drejtpërdrejtë ose të tërthortë, çmimet e blerjes ose të shitjes, apo çdo kusht tjetër tregtimi.
