Marcus Rashford po e bën gjithnjë e më të vështirë për Barcelonën të marrë një vendim negativ për të ardhmen e tij. Sulmuesi anglez ishte vendimtar në debutimin e katalanasve në Kupën e Mbretit, duke shënuar golin e fitores ndaj Guadalajara-s pothuajse në minutat shtesë. Madje, ai mund të kishte realizuar edhe një tregolësh, po të mos ishte ndërhyrja vendimtare e portierit vendas.
Me këtë gol, Rashford është aktualisht lojtari i vetëm i Barcelonës që ka shënuar në të tria kompeticionet zyrtare të sezonit. Përveç golit në Kupën e Mbretit, ai ka realizuar dy gola në La Liga (kundër Elche dhe Sevilla) si dhe dy dopieta në Ligën e Kampionëve ndaj Newcastle dhe Olympiacos. Në total, ai numëron 7 gola, ndërsa kontributi i tij më i madh ka ardhur në asistime, me plot 11 pasime vendimtare, duke u renditur ndër lojtarët me më shumë përfshirje direkte në gola në skuadër.
Këto statistika po e ndihmojnë Rashfordin në betejën për të bindur drejtuesit sportivë se ia vlen investimi për ta mbajtur në ekip. Edhe pse verën e kaluar ishte zgjedhja e tretë e drejtorit sportiv Deco për krahun e majtë të sulmit (pas Luis Díaz dhe Nico Williams), anglezi po jep paraqitje shumë pozitive, si titullar – sidomos gjatë mungesës së Raphinha-s për shkak dëmtimi – ashtu edhe si zëvendësues.
Barcelona ende nuk ka marrë një vendim përfundimtar. Deco ka pranuar se është herët për të aktivizuar klauzolën e blerjes prej 30 milionë eurosh, edhe pse çmimi mund të negociohet. Megjithatë, realiteti është se Rashford po e bën gjithnjë e më të vështirë që klubi të mos e transferojë përfundimisht në fund të sezonit.
Trajneri Hansi Flick është shumë i kënaqur me paraqitjet dhe qëndrimin e tij. Për më tepër, Rashford i ofron trajnerit fleksibilitet në repartin ofensiv: ndaj Guadalajara-s, për shembull, e nisi ndeshjen si qendërsulmues dhe e përfundoi si anësor i majtë. Flick e ka lavdëruar disa herë publikisht dhe dëshiron ta mbajë, nëse klubi nuk arrin të sjellë një titullar të padiskutueshëm.
Rashford po integrohet gjithnjë e më shumë edhe me qytetin e Barcelonës. Javën e kaluar ai mori pjesë vullnetarisht në aktivitete të fondacionit të klubit, duke vizituar shkollën Vedruna në lagjen Raval dhe Qendrën Komunitare Submarí në Zona Franca. Ana e tij humanitare, e njohur edhe në Angli, nuk është thjesht imazh.
I pyetur për përshtatjen, Rashford u shpreh qartë:
“Jo vetëm shokët e ekipit, por edhe qyteti është perfekt. Është hera ime e parë në një vend të ri dhe dua të mësoj gjuhën.”
Ideja e rikthimit te Manchester United nuk ekziston, as për lojtarin dhe as për klubin anglez. Ajo që i mbetet Rashfordit është të vazhdojë të luftojë në fushë për të bindur Barcelonën se meriton një kontratë të përhershme. Statistikat janë tashmë shumë të mira – dhe mund të përmirësohen edhe më tej.
