Presidenti amerikan Donald Trump ka njoftuar një bllokadë “të plotë dhe total” ndaj të gjitha cisternave të naftës të sanksionuara që hyjnë e dalin nga Venezuela. Në një postim në Truth Social, ai e quajti qeverinë e liderit venezuelas, Nicolás Maduro, një organizatë terroriste të huaj, duke e akuzuar për vjedhjen e aseteve amerikane dhe për “terrorizëm, trafik droge, dhe trafik njerëzish”. Ai theksoi se Venezuela është “plotësisht e rrethuar nga Armada më e madhe ndonjëherë të mbledhur në histori të Amerikës së Jugut”, duke bërë të ditur se kjo do të rritet.
Deklarata e Trumpit erdhi pas sekuestrimit të një cisternë nafte nga Shtetet e Bashkuara përballë bregut të Venezuelës. Qeveria venezuelase e refuzoi këtë “kërcënim grotesk”. Trump po ashtu akuzoi qeverinë e Maduro për përdorimin e naftës së vjedhur për të financuar aktivitete kriminale, përfshirë trafikimin e drogës dhe vrasjet.
Administrata Trump ka akuzuar vazhdimisht Venezuelën për trafik droge, ndërsa forcat amerikane kanë vrarë të paktën 90 persona në goditje ndaj anijeve që dyshoheshin se transportonin fentanil dhe droga të tjera ilegale në SHBA. Në muajt e fundit, Shtetet e Bashkuara kanë rritur praninë ushtarake në rajon, duke dërguar anije luftarake në Karaibe.
Venezuela, e njohur për rezervat e saj të mëdha të naftës, e akuzon Washingtonin për synimin e vjedhjes së burimeve të saj. Nën udhëheqjen e Trump dhe ish-presidentit Joe Biden, SHBA kanë bërë presion për largimin e qeverisë Maduro duke vendosur sanksione të rrepta. Javën e kaluar, SHBA sanksionoi gjashtë anije të tjera që transportonin naftë nga Venezuela, si dhe disa anëtarë të familjes së Maduro dhe biznese të lidhura me qeverinë e tij.
Pas sekuestrimit të cisternës “Skipper”, që e konsideroi si një “vjedhje”, qeveria venezuelase kërkoi lirimin e ekuipazhit. Kongresmeni Joaquin Castro, një demokrat nga Texas, e quajti bllokadën detare të Trump një akt lufte dhe shprehu se ligjvënësit do të votojnë për të kërkuar nga presidenti ndalimin e armiqësive me Venezuelën.
