Gazetari Almer Toska, i ftuar në emisionin “Studio24” në News24, ka komentuar zhvillimet e fundit pas kërkesës së SPAK për arrestimin e zv/kryeministres Belinda Balluku, duke ngritur pretendime për marrëdhënien e saj me kryeministrin Edi Rama dhe tensionet brenda mazhorancës.
Sipas Toskës, ekzistojnë dyshime se Balluku ka pasur një rol të fortë në vendimmarrjen qeveritare, duke firmosur, sipas tij, një pjesë të madhe të vendimeve në emër të kryeministrit. Ai pretendoi se ky rol ka shërbyer për të mbajtur mbi vete përgjegjësi dhe rreziqe politike e ligjore.
Gazetari shtoi se Balluku dyshohet të ketë kontraktuar shërbime që përfshijnë pajisje përgjimi, përfshirë teknologji të tipit IMSI Catcher, duke shtuar se këto dyshime, sipas tij, kanë shkaktuar shqetësim te partnerët ndërkombëtarë.
Almer Toska: Pyeteni Ramën kur ka firmosur për herë të fundit një vendim qeverie. Shumicën e vendimeve i ka firmosur Belinda Balluku. Rama e ka zgjedhur atë si njeriun që firmoste në emër të tij dhe merrte mbi vete riskun e vendimmarrjeve që lidhen me përfitime financiare. Ky rol ka pasur një çmim dhe ky çmim po del sot.
Ekzistojnë indicie që Balluku ka ushtruar presion dhe shantazh ndaj Edi Ramës, përmes komunikimeve që ajo dyshohet se i zotëron me kryeministrin dhe persona pranë tij.
Ka dyshime serioze se Balluku ka kontraktuar një kompani që ka përdorur pajisje përgjimi, përfshirë IMSI Catcher, gjë që ka shqetësuar edhe partnerët ndërkombëtarë. Ndërkombëtarët janë të informuar edhe për pretendimet mbi lidhje të saj me krimin e organizuar.
Nuk është rastësi që sot kanë rënë dy grupe rivale brenda Partisë Socialiste. Kur dy grupet që përplaseshin fort në PS, Agasi dhe Balluku, kanë rënë në të njëjtën ditë. Kur sot Balluku hapte shishen e shampanjës kur i ra kundërshtari, ra edhe vetë sot pasdite.
Nuk mund të legjitimohet mbrojtja e Belinda Ballukut. Ajo ka qenë e qetë në publik, por është verbëruar nga paratë e korrupsionit dhe përfitimet financiare janë në shifra shumë të larta.
