Të tjera detaje janë zbuluar nha aksidenti i rëndë me pasojë vdekjen që ndodhi mbrëmjen e sotme në aksin rrugor Tapizë–Fushë Krujë. Sipas burimeve, një automjet tip “Audi”, që drejtohej nga një 19-vjeçar, Kleo Malja, ka përplasur për vdekje një këmbësor, shtetasin Nazif Zeneli, rreth 62 vjeç, banor i zonës.
Sipas informacioneve paraprake, viktima ka qenë duke kaluar rrugën në momentin kur është goditur nga mjeti, i cili dyshohet se po lëvizte me shpejtësi të lartë.
Dëshmitarë okularë të pranishëm në vendngjarje pretendojnë se automjeti po udhëtonte me shpejtësi shumë të madhe, madje mbi 200 km/h, por këto deklarime mbeten për t’u verifikuar nga autoritetet.
Makina e ka hedhur disa metër në ajër të ndjerin, ndërkohë që për shkak të shpejtësisë së madhe, adoleshenti ka frenuar disa metër më tutje.
Pas aksidentit, drejtuesi i mjetit është shoqëruar në Komisariat për veprime të mëtejshme procedurale. Gjendja e tij shëndetësore nuk bëhet ende e ditur. Ndërkohë, shërbimet e policisë kanë rrethuar zonën, ndërsa grupi hetimor ndodhet në vendngjarje dhe po punon për sqarimin e plotë të rrethanave të aksidentit.
Sipas njoftimit zyrtar të Policisë, ngjarja ka ndodhur rreth orës 18:45 dhe hetimet janë në vijim për të përcaktuar shkaqet dhe përgjegjësitë e këtij aksidenti fatal.
