Roma mori një fitore të artë në Serie A, duke mposhtur Comon 1-0 në “Olimpico”, në një ndeshje ku verdhekuqtë kontrolluan ritmin, shtypën kundërshtarin me presing të lartë dhe e zgjidhën gjithçka me firmën e Wesley Franca.
Pjesa e parë u zhvillua pothuajse e gjitha nën kontrollin e Romës. Ekipi i Gian Piero Gasperinit qarkulloi topin me durim dhe kërkoi hapësira nga krahët, por i mungoi goditja e fundit për të thyer portën e Butez. Como, i drejtuar nga Cesc Fabregas, u mbështet kryesisht te kundërsulmet dhe u vu shpesh në vështirësi nga presingu romanist, duke krijuar pak rrezik real.
Sfida mori edhe kthesë në minutën 37’, kur Como humbi Diao për shkak dëmtimi dhe u detyrua të aktivizonte Douvikas. Megjithatë, edhe pas pushimit, Roma vazhdoi të kërkonte golin dhe pas një ore lojë gjeti çelësin e suksesit: në minutën 61’, Wesley Franca shënoi golin e fitores pas aksionit të finalizuar me asist nga Soulé.
Pas avantazhit, Como u përpoq të reagojë me zëvendësime dhe më shumë guxim, por Roma menaxhoi mirë epërsinë dhe mbrojti rezultatin deri në fund. Ndeshja u ashpërsua edhe me disa kartona të verdhë, ndërsa verdhekuqtë e mbyllën takimin me tri pikë shumë të rëndësishme për objektivat e sezonit.
