Florentino Pérez e ktheu fjalimin tradicional të fundvitit me median në një apel të fortë për “drejtësi”, duke e vendosur sërish në qendër çështjen “Negreira” dhe duke goditur mënyrën si, sipas tij, po menaxhohet arbitrazhi në Spanjë. Presidenti i Real Madridit tha se është “e pakuptueshme” që institucionet e futbollit e kanë lënë klubin “të vetëm në këtë betejë”, ndërsa kërkoi që të mos mbyllet sytë ndaj asaj që e quajti “skandali më i madh në historinë e futbollit”.
Pérez ngriti akuza të drejtpërdrejta ndaj Federatës dhe LaLigës për mungesë veprimi, duke theksuar se detyra e tyre është të mbrojnë integritetin e garës dhe të mos duken si “bashkëfajtorë” në një çështje kaq të rëndë. Në fokus të deklaratës së tij ishte fakti se, sipas informacioneve të bëra publike, janë paguar mbi 8 milionë euro për raporte teknike mbi arbitrat — “raportet më të shtrenjta në botë” — por, sipas tij, “trajnerët nuk i morën kurrë”, madje disa prej tyre kanë deklaruar se as nuk e dinin që ekzistonin.
Në Bernabéu, sipas Florentinos, bindja është e qartë: Real Madridi ndihet i dëmtuar dhe do ta çojë presionin deri në fund. Ai njoftoi se klubi po përgatit një dosje që do t’i dërgohet FIFA-s, ku do të përfshihen elementë si video, lista arbitrarësh, raporte me shuma, statistika dhe materiale të tjera që, sipas Realit, provojnë se situata kërkon ndërhyrje të menjëhershme dhe ndryshim rrënjësor në strukturat e arbitrazhit spanjoll.
Rasti i penalltisë ndaj Vinicius
Pjesë e sulmit të Florentinos ishte edhe episodi i fundit në Mendizorroza, ku Vinicius u rrëzua në zonë me rezultatin 1-2, por arbitri në fushë nuk akordoi penallti dhe as VAR-i nuk e thirri për rishikim. Trajneri Xabi Alonso reagoi me ironi, duke thënë se për të ishte “penallti e pastër” dhe se e habit fakti që nuk u shkua fare te VAR — “por… nuk jemi të surprizuar”.
Florentino e lidhi këtë klimë me tensionet e krijuara prej arbitrit González Fuertes (VAR në atë ndeshje), duke kujtuar deklaratat e mëparshme ku ai kishte folur për masa ndaj klubit pas polemikave me videot e Real Madrid TV. Presidenti shtoi se, sipas tij, këtë sezon po shihet një “politikë e re”: faullet ndaj Vinicius (kundër Alavés) dhe Rodrygo (kundër Gironës) “nuk po konsiderohen penallti”.
Në mbyllje, Pérez theksoi se Real Madridi nuk beson se është i vetmi klub i dëmtuar nga kjo situatë dhe la të kuptohet se pasojat mund të kenë prekur edhe klube të tjera, madje duke çuar deri te rëniet nga kategoria. Ai kujtoi gjithashtu se gjyqtari hetues e ka përshkruar çështjen si “korrupsion sistemik”, ndërsa kërkoi që viti 2026 të jetë momenti i “rigjenerimit” të futbollit spanjoll përmes vendosjes së drejtësisë.
