Pavarësisht lehtësimit që sollën tri pikët, te Real Madridi mbetet i njëjti shqetësim: fitorja erdhi, por jo përmirësimi i lojës dhe as “ndjesia” që kërkohej nga stafi teknik dhe lojtarët. Kjo është përfundimi i parë në Valdebebas pas asaj që ndodhi në Mendizorroza, ku skuadra e Xabi Alonsos “u kujtua si fitohet”, por pa bindur plotësisht në paraqitje.
Sipas burimeve pranë klubit, pyetja kryesore mbetet e hapur: deri ku mund të shkojë Real Madridi me sistemin aktual? Tri pikët shërbejnë për të ulur presionin, por jo për ta mbyllur debatin.
Në klub ka një frikë të qartë që historia të mos përsëritet. Nëse sezonin e kaluar ishte Superkupa ajo që vendosi tonin, tani Real Madridi nuk dëshiron një tjetër “déjà vu”. Deri në fund të vitit 2025 kanë mbetur edhe dy ndeshje, të cilat priten të jenë vendimtare për të kuptuar nëse projekti aktual ka të ardhme — jo vetëm nga rezultati, por nga sinjali që do të japë skuadra në fushë.
Në Valdebebas po kërkojnë një “shkëndijë” që të ndryshojë atmosferën. Nuk përjashtohet që ajo të vijë ende me trajnerin aktual, por koha po shkurtohet dhe kjo kthesë nuk është parë ende. Ndeshjet në Talavera dhe Sevilla konsiderohen si testi i radhës: nëse rikthejnë entuziazmin e fillimit të epokës së Xabi Alonsos, projekti mund të vazhdojë; në të kundërt, gjithçka do të vihet në diskutim.
Një tjetër faktor që e rëndon situatën është gjendja fizike e ekipit. Sipas raporteve të përgatitura nga klubi, të cilave iu referua më herët edhe gazeta AS, skuadra vlerësohet si e dobësuar ndjeshëm në aspektin fizik dhe rikthimi i këtij niveli nuk pritet të ndodhë “brenda natës”.
Ndërkohë, Fernando Carro, CEO aktual i Bayer Leverkusen, ka deklaruar se është takuar dy herë së fundmi në Madrid me ish-trajnerin e tij, Xabi Alonso. Marrëdhënia mes dy klubeve përshkruhet si e tensionuar, për shkak të pagesës së klauzolës së largimit të Alonsos, ndërsa komentet e Carros për “izolimin” e trajnerit nuk janë pritur mirë në Valdebebas, të paktën sipas burimeve brenda klubit.
Sa i përket të ardhmes në stol, ka lëvizje në prapaskenë, por pa sinjale për ndryshim të menjëhershëm. Ditët e fundit, disa agjentë kanë kontaktuar drejtuesit e Real Madridit, por sipas informacionit të disponueshëm, nuk kanë marrë asnjë indicie që klubi po kërkon trajner të ri — përkundrazi.
Një skenar alternativ që përmendet është “zgjidhja brenda shtëpisë”: Solari dhe një staf i ndërtuar “Made in Valdebebas”, si plan emergjent nëse situata kërkon ndërhyrje.
Në Real Madrid e kanë të qartë se testi i madh mund të vijë sërish në Superkupë — një moment ky që sezonin e kaluar i kushtoi shumë projektit të Carlo Ancelottit. Nëse ai prag mbërrin, në klub mendojnë se për Xabi Alonson do të ishte, paradoksalisht, “lajm i mirë”: do të thotë se ka arritur ende në garë dhe ka një shans të fundit për ta kthyer rrjedhën.
