Në gjykimin ndaj Muhamet Hajredinajt, i akuzuar për nxitje të përçarjes, dëshminë e dha Fatos Berisha, ish-zëvendësdrejtor i shkollës “Xhemail Mustafa”. Ai rrëfeu se nxënësit ishin të mllefosur pas një incidenti ku Hajredinaj, mësues anglishte, hodhi flamurin kombëtar dhe plisin e një nxënëse në mbeturina. Dëshmitari tha se nxënësit e shprehën frustrimin e tyre, duke folur të gjithë njëherësh, dhe një prej tyre e quajti arsimtarin ‘qen’, duke e akuzuar për indoktrinim.
Berisha përmendi se kishte patur një bisedë me Hajredinajn pas incidentit. Kur e pyeti arsimtarin për pse kishte përjashtuar një nxënëse nga klasa, ai tregoi se Hajredinaj nuk i dha një shpjegim të qartë, por më vonë e pranoi se arsyeja ishte në lidhje me simbolet kombëtare. Dëshmitari theksoi gjithashtu se prindërit kishin bërë ankesë për ligjëratat me përmbajtje fetare të mësuesit, të cilat ishin jashtë planprogramit.
Gjatë seancës, avokati i Hajredinajt pyeti nëse ai kishte qenë i ftuar në festën e 28 Nëntorit, ku Berisha konfirmoi se të gjithë nxënësit dhe mësuesit ishin të ftuar, por Hajredinaj nuk mori pjesë në organizimin e saj. Ai gjithashtu nënvizoi se Hajredinaj kishte një dosje për shkelje disiplinore në shkollë dhe se kishte përjashtuar vetëm një nxënëse, kur të tjerët ishin lejuar të mbanin simbole kombëtare.
Sipas aktakuzës së Prokurorisë Speciale, Hajredinaj, duke e ditur se më 27 nëntor 2024 shënohej Dita e Flamurit Kombëtar, hodhi në mbeturina flamurin dhe plisin, duke shkaktuar reagime të forta nga nxënësit dhe duke nxitur urrejtje ndërmjet grupeve kombëtare dhe fetare. Kjo sjellje, sipas akuzës, dëshmon për qëllimin e tij të qartë për të shkaktuar mosdurim dhe përçarje.
