Më 11 dhjetor 2025, Prokurori Klodjan Braho u zgjodh si pasues i Altin Dumanit në krye të Prokurorisë së Posaçme kundër Korrupsionit dhe Krimit të Organizuar (SPAK). Braho u zgjodh me shtatë vota nga Këshilli i Lartë Prokurorial, ndërsa Adnan Xholi mori tri vota dhe Elvin Gjokaj një. Doloreza Musabelliu nuk arriti të siguronte asnjë votë. Dumanit i përfundon mandati më 16 dhjetor, kur Braho do të fillojë mandatin e tij trevjeçar, pa mundësi rizgjedhje.
Klodjan Braho, i lindur më 21 korrik 1982 në Skrapar, ka një rrugëtim të gjatë në karrierën e tij ligjore. Ai ka përfunduar studimet në Fakultetin e Drejtësisë nga viti 2000 deri në 2004 dhe më pas ka vazhduar në Shkollën e Magjistraturës nga viti 2005 në 2008, duke u emëruar prokuror më 14 nëntor 2007. Gjatë karrierës së tij, Braho ka mbajtur disa pozita të rëndësishme:
– Nga 14 nëntori 2007 deri në vitin 2012, ai ishte prokuror pranë Prokurorisë së Gjykatës së Rrethit Gjyqësor në Berat.
– Pas kësaj, nga 2012 deri në 2015, vazhdoi si prokuror pranë Gjykatës së Rrethit Gjyqësor Vlorë, ku gjithashtu shërbeu si zv.drejtues.
– Më pas, nga viti 2015 deri më 19 dhjetor 2019, ai ishte prokuror në Prokurorinë pranë Gjykatës së Shkallës së Parë për Krimet e Rënda në Tiranë.
– Që nga 19 dhjetori 2019, Braho ka pasur një pozicion të rëndësishëm si prokuror pranë SPAK.
Zgjedhja e tij në krye të SPAK-së vjen në një kohë sfiduese për sistemin e drejtësisë në Shqipëri, ku përballja me korrupsionin dhe krimin e organizuar është një nga prioritete më të mëdha. Braho pritet të sjellë një qasje të re dhe efikase në luftën kundër këtyre fenomeneve, duke u bazuar në përvojën e tij të deritanishme.
