Autoritetet franceze kanë ngritur shqetësime për pasojat e rënda të ciklonit Chido, që goditi arkipelagun Mayotte në Oqeanin Indian. Prefekti lokal François-Xavier Bieuville, deklaroi se numri i viktimave mund të jetë qindra, madje edhe mijëra, por shifra e saktë mbetet e paqartë për momentin.
Cikloni, i cili arriti me erëra që kalonin 200 km/h, ka shkaktuar shkatërrime masive në ndërtesa, spitale dhe vendstrehime.
Meteo-France e cilësoi si stuhinë më të fuqishme në mbi 90 vite, ndërsa pamjet ajrore tregojnë rrënojat e shumë banesave, veçanërisht në zonat ku jetojnë emigrantë të paligjshëm.Autoritetet raportojnë vështirësi në evidentimin e viktimave, për shkak të traditave lokale që kërkojnë varrosjen brenda 24 orëve. Për më tepër, Mayotte po përballet me mungesa të ushqimit, ujit të pijshëm dhe kushteve bazë të higjienës.
Mayotte, një nga rajonet më të varfra të Francës, ndodhet mijëra kilometra larg Parisit dhe përballet prej vitesh me trazira sociale dhe dhunë nga bandat. Rreth 77% e popullsisë jeton nën pragun e varfërisë, duke e bërë situatën edhe më të rëndë pas ciklonit.
