Protestat e fermerëve në Greqi po marrin përmasa të reja, me tensione të forta që u regjistruan sot në Kretë, ku aeroportet dhe rrugët kryesore u kthyen në skenë përplasjesh mes protestuesve dhe forcave të policisë.
Në Heraklion, fermerët hynë në aeroportin “Nikos Kazantzakis”, duke e bllokuar atë deri në një njoftim të dytë. Rruga Senetaki u mbyll nga policia, ndërsa protestuesit tentuan disa herë të thyenin bllokadën për të arritur deri në aeroport.
Policia u kundërpërgjigj me lëndë kimikate, duke shkaktuar incidente të shumta dhe një atmosferë të ndezur për orë të tëra. Trafiku nga Heraklioni drejt aeroportit është bërë praktikisht i pakalueshëm, pasi mjetet bujqësore janë parkuar përgjatë autostradës VOAK.
Pamje nga protesta e fermereve
Incidentet nisën pas refuzimit të policisë për të lejuar fermerët të bllokonin paqësisht aeroportin e Soudës për tre orë. Përpjekja e tyre për të çarë kordonin e sigurisë solli reagimin e menjëhershëm të forcave të rendit, duke ndezur konfliktin.
Protestat nuk kufizohen vetëm në Kretë. Në Thesali, Greqinë Qendrore, Peloponez dhe Maqedoninë Perëndimore, fermerët po bllokojnë rrugët kombëtare, daljet dhe zyrat doganore, duke ndërprerë tërësisht trafikun. Bllokada të reja janë ngritur edhe në doganat e Greqisë së veriut, ku situata mbetet e tensionuar.
Një pjesë e rëndësishme e planit të veprimit të fermerëve përfshin bllokimin e porteve të Volosit dhe Selanikut. Sipas deklaratave të protestuesve, porti i Selanikut konsiderohet tashmë “i bllokuar”, ndërsa në Volos priten bllokime të njëkohshme nga toka dhe deti në ditët në vijim.
Sipas asaj që mediat vendase raportojnë mësohet se qeveria dhe Ministria e Zhvillimit Rural janë ende në pritje të një strukture përfaqësimi nga protestuesit, për të zhvilluar një dialog të drejtpërdrejtë. Deri tani, një marrëveshje për mënyrën e negocimit nuk është arritur.
Sakaq, rreth mesditës, qindra fermerë me rreth 25 traktorë u drejtuan drejt zyrës së ministrit të Zhvillimit Rural, Kostas Tsiaras, në Karditsa. Policia ngriti barriera të fortifikuara me kafaze metalike, duke penguar hyrjen dhe shkaktuar kundërprotesta të reja.
Kërkesat e fermerëve
Fermerët në të gjithë vendin kërkojnë një plan të plotë dhe afatgjatë për mbështetjen e bujqësisë greke, ndërhyrje kundër monopoleve dhe karteleve në tregun bujqësor, si dhe ndëshkimin e përgjegjësve të skandaleve të fundit, përfshirë atë të OPEKEPE-së.
Ndërsa bllokadat po ashpërsohen dhe protestat po përhapen në zona të reja, Greqia po përballet me një krizë të thellë bujqësore, e cila kërkon zgjidhje të shpejtë për të shmangur paralizimin e mëtejshëm të transportit dhe porteve strategjike të vendit.
