Në vitin 2025, Europa përjetoi sezonin më të rëndë të zjarreve në natyrë, sipas vlerësimeve të Shërbimit Europian të Informacionit për Zjarret Pyjore (EFFIS). Kjo duket si një konfirmim i një trendi alarmues, ku sezonet e zjarreve po bëhen gjithnjë e më të gjata dhe shkatërruese. Të dhënat tregojnë se zjarret në kontinent po rriten në frekuencë, intensitet dhe kompleksitet në menaxhim.
Parashikimet tregojnë se sipërfaqja e djegur në vitin 2025 do të kapërcejë çdo rekord që nga fillimi i regjistrimeve sistematike në vitin 2006. Viti 2024 kishte regjistruar gjithashtu një numër rekord zjarresh, me 8.343 raste, katërfish më shumë se mesatarja afatgjatë. Shtetet e goditura më ashpër përfshinin Bullgarinë, Greqinë, Italinë, Portugalinë dhe Spanjën, ku gjithsej janë djegur 334.940 hektarë. Edhe vendet joanëtare të Bashkimit Evropian si Shqipëria, Bosnja dhe Hercegovina, Maqedonia e Veriut, Turqia dhe Ukraina përjetuan dëme të konsiderueshme.
EFFIS paralajmëron se modelet e zjarreve në Evropë po transformohen ndjeshëm. Rritja e frekuencës dhe intensitetit të zjarreve, së bashku me zgjatjen e sezonit, kanë vendosur një presion të jashtëzakonshëm mbi shërbimet zjarrfikëse në mbarë kontinentin. Zyrtarët e Bashkimit Evropian theksojnë rëndësinë e forcimit të kapaciteteve për shuarjen e zjarreve, por gjithashtu nënvizojnë nevojën për masa parandaluese.
Kjo përfshin menaxhimin e integruar të zjarreve dhe përdorimin e zgjidhjeve të bazuara në natyrë për të përmirësuar menaxhimin e ekosistemeve. Duke marrë parasysh trendin e rritjes së zjarreve, bëhet e domosdoshme përkrahja e politikat më efikase për të parandaluar katastrofat natyrore dhe për të mbrojtur ekosistemet dhe jetesën e njerëzve në rajonet e prekura. Kjo sfidë e re kërkon një qasje të koordinuar dhe inovative për të trajtuar rreziqet që sjellin zjarret në natyrë.
