David Beckham ka kujtuar me humor ditët te Manchester United, duke zbuluar si një prerje flokësh “trendy” u kthye në një urdhër të prerë nga Sir Alex Ferguson.
Ish-mesfushori anglez, sot president i Inter Miami, tregoi se një ditë vendosi të bënte një mohikan, por e dinte që Ferguson nuk do ta pëlqente. Për disa ditë ai e fshehu modelin me kapelë kudo—në dhomat e zhveshjes, në stërvitje dhe madje edhe gjatë vakteve. Por në ditën e ndeshjes, kapela duhej hequr.
“Sapo dola për nxehmje, Ferguson më tha: ‘Rruaje menjëherë.’ Qesha, por ai ndryshoi fytyrë dhe më tha: ‘Jam serioz, rruaje tani.’ Shkova në banjë dhe e rruava,” kujtoi Beckham.
Beckham luajti për Manchester United nga 1995 deri në 2003, përpara se të transferohej te Real Madridi për rreth 37.5 milionë euro. Me “Djajtë e Kuq” ai zhvilloi 394 ndeshje, shënoi 85 gola dhe dhuroi 121 asistime. Kohët e fundit, Beckham është nderuar me titullin “Sir” pas marrjes së kalorësisë në Mbretërinë e Bashkuar.
