Gjyqtarët e Gjykatës Kushtetuese takim me Nancy VanHorn, e ngarkuara me Punë e SHBA
Sot, Kryetarja e Gjykatës Kushtetuese, Holta Zaçaj, dhe trupa e saj e gjyqtarëve zhvilluan një takim me të Ngarkuarën me Punë të Ambasadës së SHBA-së në Shqipëri, Nancy VanHorn, e cila shoqërohej nga këshilltarët ligjorë rezidentë, Mary Kate Butterfield dhe David Backman.
Gjatë takimit, Kryetarja Zaçaj theksoi hapat e ndërmarrë për të rritur transparencën dhe informimin publik mbi veprimtarinë e Gjykatës Kushtetuese, me synim përmirësimin e reputacionit dhe kredibilitetit të institucionit. Aktivitetet kryesore përfshijnë:
- Miratimin e Rregullores për Marrëdhëniet me Median.
- Akreditimin e gazetarëve që ndjekin veprimtarinë e Gjykatës.
- Organizimin e konferencave interaktive për shtyp.
- Transmetimin e seancave gjyqësore publike përmes Live Stream.
Palët diskutuan rëndësinë e rolit të Gjykatës Kushtetuese në hierarkinë shtetërore dhe rolin e paanshëm dhe integritetin e gjyqtarëve në përmbushjen e misionit kushtetues.
U bisedua gjithashtu për gjetjen e mekanizmave për mbështetje dhe bashkëpunim për rritjen e kapaciteteve dhe përmirësimin e infrastrukturës, me synim garantimin e mbrojtjes së të drejtave themelore të individit, forcimin e demokracisë dhe shtetit të së drejtës.
