Futbolli brazilian përballet me pasiguri, teksa Neymar kalon një nga periudhat më të vështira të karrierës së tij. Rikthimi emocionues i 33-vjeçarit te Santos është zbehur nga një sërë dëmtimesh, ndërsa së fundmi një problem i rëndë në menisk e ka mbajtur jashtë fushës për një kohë të gjatë.
Ylli brazilian nuk ka luajtur për kombëtaren që nga tetori i vitit 2023, pas këputjes së ligamentit të gjurit (ACL). Megjithatë, pavarësisht këshillave të stafit mjekësor për të pushuar, ai ka zgjedhur të rrezikojë dhe të rikthehet në lojë për të ndihmuar Santosin, i cili po luftonte në zonën e rënies nga kategoria.
Në një nga ndeshjet e fundit, Neymar madje arriti të shënojë në fitoren 3-0 që e nxori përkohësisht klubin nga zona e ftohtë.
Raportimet më të reja tregojnë se gjendja e tij është më serioze sesa parashikohej fillimisht. Lojtari vuan nga një dëmtim në meniskun e majtë, i cili kërkon ndërhyrje kirurgjikale.
Përkundër kësaj, ai vazhdon stërvitjet dhe paraqitjet, duke rrezikuar rëndë gjurin dhe të ardhmen e tij sportive. Dëmtimet në menisk janë të zakonshme te sportistët që kryejnë lëvizje të shpejta dhe kthesa të forta, ndërsa rikuperimi pas operacionit mund të zgjasë nga tre deri në tetë javë, varësisht nga shkalla e dëmtimit.
Përveç sfidave shëndetësore, Neymar përballet edhe me pritshmëritë e larta të trajnerit të Brazilit, Carlo Ancelotti, i cili pritet të shtyjë rikthimin e tij në kombëtare deri sa lojtari të jetë plotësisht i gatshëm.
Me Kupën e Botës 2026 që starton më 11 qershor, mbetet e paqartë nëse Neymar do të arrijë formën optimale në kohë. E ardhmja e tij është në një moment delikat, teksa çdo vendim do të ketë ndikim të madh si për Santosin, ashtu edhe për ambiciet e tij ndërkombëtare.
