Deputeti i Partisë Demokratike, Saimir Korreshi, ka shkaktuar të qeshura dhe ka shtuar një notë humoristike gjatë seancës së Komisionit të Ligjeve, ku po shqyrtohej projektligji “Për parandalimin e konfliktit të interesave në ushtrimin e funksioneve publike”.
Korreshi, me një ironizë të theksuar, ka ngritur pyetje të pazakonta dhe ka bërë batuta, duke e sfiduar seriozitetin e ligjit me situata të përditshme. Një nga pyetjet që ai ngriti ishte në lidhje me dy qen që një mik i tij ia kishte dhuruar, duke pyetur: “A duhet të deklaroj këto qen si deputet, apo si mik?”
Në vijim, Korreshi vazhdoi me humorin e tij, duke thënë se, sipas tij, edhe “çështjet e krevatit” mund të përbëjnë konflikt interesi, duke ironizuar mbi mundësinë që ligji mund të përfshijë edhe situata të tjera të papritura dhe personale.
“Kam nja dy pyetje konkrete, se duhet sqaruar konflikti i interesit. Të nderuara kolege se na duket e çuditshme që ju shohim aty. Ju i jeni referuar Suedisë dhe Danimarkës, apo jo! Po do ju kujtoj në humor të Fadil Hasës, kur erdhët nja 100 vite pas dhe 500 anësh. Si do i zgjidhni këto çështjet e dhuratave. Pjesa e parë është që kur të vjen dikush do të qirasë dhe thotë; po të jap një kafe. Ti thua; jo është konflikt interesit. Dje më dhuroi një shok im dy qenë. Ta pyes, më dhuroi dy qen si deputet apo si Saimir. Kam dhe një gjë tjetër o Ulsi! Konflikt interesi! Gruaja nuk do që të shkojë me mua, por me deputetin që jam unë. Edhe këtu do të hyjmë! Të shkoj në krevat. Po lëre tani! A është konflikt ky?”, tha Korreshi.
