Gjykata Themelore e Mitrovicës ka shpallur më 1 dhjetor 2025 aktgjykimin ndaj Jetmir Sinanit, i cili u dënua me 24 vjet burg për vrasjen e F.Z. dhe L.M., ngjarje e ndodhur më 29 shtator 2023 në Vushtrri. Gjyqtari Xhemajl Jusufi e shpalli Sinanin fajtor për veprën penale “Vrasje e rëndë”, duke e dënuar me 23 vjet burgim, si dhe për veprën “Mbajtje në pronësi, kontroll ose posedim të paautorizuar të armëve”, për të cilën mori 1 vit e gjysmë burgim.
Gjykata konfirmoi se Sinanit do t’i llogaritet edhe koha e kaluar në paraburgim. Mbrojtja, e përfaqësuar nga avokati Fanol Krasniqi, pretendoi se i pandehuri kishte vepruar nën një gjendje të rënduar emocionale, por këto argumente u hodhën poshtë. Sipas ekspertizës psikiatrike, Sinani ka qenë në një gjendje të qëndrueshme mendore në momentin e kryerjes së veprës.
Gjyqtari Jusufi sqaroi se, megjithëse kishte pasur një përleshje fizike ditën e ngjarjes, sulmi nga ana e viktimave kishte përfunduar para se Sinani të ndërmerrte veprimin fatal. Dëshmitë e paraqitura konfirmuan se veprimi i tij ishte kryer pasi përplasja kishte marrë fund, çka përjashton pretendimin për mbrojtje të nevojshme.
Sinani u obligua të paguajë gjithsej 640 euro në emër të shpenzimeve procedurale dhe tarifave të tjera gjyqësore. Gjykata urdhëroi gjithashtu konfiskimin e armës së përdorur, një AK-47, si dhe disa fishekë. Palët e dëmtuara u udhëzuan t’i ndjekin kërkesat për kompensim në procedurë civile.
