Është ndarë nga jeta në moshën 52-vjeçare Ipeshkvi i Dioqezës së Sapës, Imzot Simon Kulli. Nga sa mësohet, Ipeshkvi Kulli ka pësuar arrest kardiak mëngjesin e kësaj të shtune.
Simon Kulli lindi më 14.02.1973 në fshatin Pistull të Dioqezës së Sapës. Shkollën fillore dhe të mesme e kreu në fshatin Pistull.
Më 2 shkurt 1992 hyri në Seminarin Ndërdioqezan Shqiptar “Zoja e Këshillit të Mirë” në Shkodër dhe kreu dy vite parapërgatitore për fillimin e studimeve filozofike e teologjike.
Në vitin 1994 filloi studimet e Filozofisë; pas dy vitesh, në vitin 1996 filloi studimet e Teologjisë, ndërsa më 14 shtator të vitit 1999 shugurohet diakon në Katedralen e Shkodrës. Gjatë periudhës së diakonatit, nga shtatori deri në janar të vitit 1999, shërbeu në Katedralen e Shkodrës me famullitarin Dom Lucjan Avgustini, dhe nga janari i vitit 2000 deri në qershor shërbeu në Dajç të Zadrimës me Dom Injac Dema, Vikar Gjeneral i Dioqezës.
Më 29 qershor të vitit jubilar 2000, shugurohet meshtar po në Katedralen e Shkodrës së bashku me katër meshtarë të tjerë shqiptarë nga Imzot Angelo Massafra. Këto janë shugurimet e para meshtarake që u kryen pas 46 viteve të regjimit komunist në Shqipëri.
Pas shugurimit meshtarak, menjëherë u emërua në Dajç të Zadrimës dhe shërbeu si ndihmës famullitar pranë Mons. Injac Demës, e njëkohësisht ishte dhe Sekretar i Ipeshkëvit të Dioqezës së Sapës, në atë kohë Imzot Dodë Gjergjit. Në Dajç shërbeu nga viti 2000 – 2002.
Në vitin 2002, Dom Simoni emërohet Kancelar Dioqezan i Sapës.
Nga viti 2001 deri në vitin 2012 kreu detyrën e Drejtorit të Caritasit Dioqezan të Sapës. Po nga viti 2010 deri më 25 maj ushtroi detyrën e Delegatit të Caritasit Dioqezan, si edhe detyrën e Vikarit Gjeneral dhe Ekonomit të Dioqezës së Sapës.
Me kalimin në amshim të ipeshkëvit Imzot Lucjan Avgustini, më 25 maj 2016, Dom Simon Kulli u zgjodh nga Këshilli i Konsultorëve “Administrator Dioqezan i Dioqezës së Sapës”.
