Në Katedralen “Ngjallja e Krishtit” në Tiranë po zhvillohet Dhoksologjia e Flamurit, një shërbesë e posaçme kushtuar nderimit të simbolit kombëtar dhe lutjes për paqe e harmoni. Ceremonia drejtohet nga Fortlumturia e Tij, Kryepeshkopi Joan, i cili udhëheq meshën solemne në prani të klerikëve, besimtarëve dhe përfaqësuesve të institucioneve.
Kjo meshë tradicionale kryhet për herë të parë në Tiranë, pasi më parë imzot Joan e ka kryer atë kur shërbente si mitropolit i Korçës.
Ceremonia shërben si një moment reflektimi shpirtëror për unitetin dhe vlerat kombëtare. Gjatë saj pritet të mbahen lutje për mbarësi, mirëqenie dhe paqe në vend.
“GËZUAR DITËN E FLAMURIT! “O Zot, që bekon dhe shenjtëron, ti bekoje flamurin tonë, dhe shpëtoje shtetin tonë dhe popullin tonë nga çdo rrezik dhe shtrëngesë dhe drejtoje në udhën e dritës, të lirisë dhe të përparimit nën hijen tënde dhe vlerësona ne të pavyerit të kremtojmë këtë ditë të lavdëruar, me nder, shëndet edhe ditë të gjata këtu dhe kudo. Se ti je Perëndi mëshirues dhe njeridashës, dhe ty ta dërgojmë lavdinë, Atit edhe Birit edhe Shpirtit të Shenjtë, tani dhe përherë, dhe në jetët e jetëve”. Urata nga Shërbesa e Dhoksologjisë së Flamurit, që kryhet nëpër kishat orthodhokse.
