Një 40-vjeçar shqiptar është dënuar me 6 vite burg në Itali, pas arratisjes së bujshme nga Komisariati i Castiglione del Lago në vitin 2023. Vendimi u dha nga Gjykata pasi prokuroria kërkoi 14 vite burg, por kërkesa u rrëzua pjesërisht.
Ngjarja ndodhi dy vite më parë, kur shqiptari ishte ndaluar për një seri veprash kriminale. Gjatë një kontrolli të karabinierëve në Castiglione del Lago, ai theu postbllokun, nisi një ndjekje nëpër rrugët e zonës dhe braktisi makinën për t’u larguar në këmbë. Karabinierët e ndoqën dhe e kapën menjëherë, duke e shoqëruar në komisariat.
Pak orë më vonë, ai arriti të largohej nga ambientet e stacionit, duke përfituar nga një moment shpërqendrimi të efektivëve. Kërkimet zgjatën disa ditë, derisa policia e gjeti në zonën e Romës dhe e riktheu në qeli.
Çfarë u gjet në makinën e vjedhur
Hetimet zbuluan se automjeti me të cilin ai udhëtonte ishte raportuar i vjedhur. Brenda makinës “Alfa” u gjetën:
një pistoletë Tanfoglio Limited 40HC me numër serial të fshirë,
një karikator me 16 fishekë,
mjete të përshtatshme për vjedhje me thyerje, si mulli këndor dhe levë metalike,
targa të falsifikuara.
Përballë këtij materiali provues, prokurorja Gemma Miliani kërkoi 14 vite burg. Avokati i të pandehurit, Vincenzo Bochicchio, kërkoi që ai të dërgohej në një komunitet nën arrest shtëpiak, por gjykata vendosi dënimin përfundimtar prej 6 vitesh.
