Kryetari i PD-së, Sali Berisha, në një deklaratë për mediat nga selia blu, u shpreh se reshjet e fundit, të kombinuara me korrupsionin qeveritar, kanë shkaktuar dëme të mëdha në pronat e mijëra qytetarëve në të gjithë vendin.
Sipas tij, jo vetëm infrastruktura është goditur rëndë, por edhe qindra hektarë sera, mijëra kokë bagëti dhe elementë të rëndësishëm të infrastrukturës së fshatrave janë shkatërruar si rrallë herë më parë.
Berisha tha se shirat e dendura nxorën në pah “infrastrukturën fiktive ose të munguar kundër përmbytjeve”, duke akuzuar se kanalet kulluese në shumë zona janë të mbyllura për shkak të mungesës së mirëmbajtjes, pasi “paratë vidhen”.
Ai solli në vëmendje pamjet e bëra virale të disa prej akseve kryesore rrugore, si Qukës–Qafë Pllocë, Kardhiq–Delvinë, Rruga e Arbrit apo segmenti Korçë–Ersekë, të cilat pësuan shembje pak kohë pas inaugurimit.
Në kontrast, Berisha vuri në dukje se skarpatet e rrugëve të ndërtuara 13–15 vite më parë, si ato në Rrugën e Kombit, Levan–Tepelenë apo Tepelenë–Gjirokastër, nuk kanë lëvizur, ndonëse projektet e asaj kohe kushtonin shumë më pak.
Sipas tij, ndërtimet e viteve të fundit janë të mbingarkuara me abuzime, duke pretenduar se shpenzimet për ndërtimin e një kilometri rrugë janë 6 deri në 10 herë më të larta, ndërsa përforcimi i skarpateve është lënë pas dore.
Berisha përmendi si shembull përforcimin shumëvjeçar të skarpatave në aksin Tepelenë–Gjirokastër, që sipas tij nuk ka pësuar dëmtime, sepse “paratë e taksapaguesve nuk janë vjedhur”.
Ai kërkoi llogari për dëmet e shkaktuara dhe akuzoi qeverinë se me korrupsionin e saj po rrezikon sigurinë dhe pasuritë e qytetarëve.
