U cilësua si dueli i dy supertalentëve adoleshentë – por këtë herë ishte Lamine Yamal ai që doli nga qendra e vëmendjes, i lënë në hije nga një tjetër fenomen.
Kjo ishte nata e Estevão Willian.
Me Chelsea-n që kryesonte 1–0 dhe Barcelonën me 10 lojtarë, 18-vjeçari brazilian prodhoi një moment magjik që elektrizoi edhe më shumë Stamford Bridge.
Pasi mori një pasim nga Reece James, Estevão hyri brenda zonës, “shkundi” Alejandro Balden me një lëvizje të shpejtë dhe lëshoi një goditje të fortë që përfundoi në tavanin e rrjetës së portës së Joan Garcias.
Ish-ylli i Chelsea-t, Pat Nevin, tha: “Filloni ta besoni ‘hypen’.”
“Goli është pjesa që të gjithë do ta shohin – ishte fantastik në çdo aspekt,” tha Nevin për BBC Radio 5 Live pas fitores 3–0. “Por mënyra si lëvizi, pozicionimi, inteligjenca në lojë… është natyral. Ka elegancë, lëviz ndryshe nga të tjerët. Është e bukur për t’u parë.”
Edhe ish-sulmuesi Daniel Sturridge shtoi për Amazon Prime:
“Pritej të ishte nata e Yamalit, por ajo që bëri Estevão ishte thjesht e shkëlqyer.”
Yamal u zëvendësua në minutën e 80-të nën fishkëllima, me ndeshjen tashmë të humbur.
Dy minuta e 40 sekonda më vonë, Estevão doli nën duartrokitjet e të gjithë stadiumit.
“Momenti më i mirë i karrierës sime deri tani”
Kjo ishte hera e parë që dy talentet 18-vjeçare përballeshin në një ndeshje zyrtare. Ata kanë lindur vetëm tre muaj larg, të dy në vitin 2007, dhe sot konsiderohen dy adoleshentët më të vlefshëm në botën e futbollit.
Sipas CIES Football Observatory, Yamal ka një vlerësim marramendës prej 307.4 milionë paund, ndërsa Estevão vlerësohet rreth 103.8 milionë paund.
Yamal është më i afirmuar: vend i dytë në Topin e Artë pas Dembélé-së, kampion i Europës me Spanjën në moshën 17-vjeçare dhe dy herë fitues i çmimit Kopa. Ka 31 gola e 42 asistime për Barcelonën, si dhe 6 gola për Spanjën.
Ndërsa Estevão, që nisi karrierën te Palmeiras, ka shënuar pesë gola për Chelsea-n këtë sezon dhe është konsideruar talent i jashtëzakonshëm prej kohësh.
Megjithatë, vetë ai pranon se goli ndaj Barcelonës ishte më i veçanti:
“Nuk kam fjalë. Ishte nata perfekte. U gjeta në hapësirë, kalova dy lojtarë dhe godita. Ishte me të vërtetë momenti më i mirë i karrierës sime derisa tani.”
Krahasimet me Messin dhe Ronaldon? “Shumë presion për ta”
Chelsea e bleu Estevão-n për 29 milionë paund (që mund të shkojë në 51 milionë), duke ditur se po merrte një talent të madh.
Por trajneri Enzo Maresca e frenoi çdo krahasim të tepruar:
“Janë shumë të rinj. T’i krahasosh me Messin dhe Ronaldon është presion i tepruar. Duhet të shijojnë futbollin.”
Ai shtoi: “Varet nga plani i lojës. Sot, në ndoshta ndeshjen më të vështirë të sezonit, vendosëm të luanim me Estevão-n.”
Si u “zhduk” Yamal nga loja?
Në anën tjetër, Yamal pati një fillim të mirë, por më pas u neutralizua plotësisht nga Marc Cucurella.
Nevin tha:
“Ka disa mbrojtës që e duan duelin një kundër një – dhe Cucurella është i jashtëzakonshëm. Yamal në fillim dukej mirë, pastaj thjesht u zhduk. Cucurella e mbajti në xhep.”
Performanca e spanjollit u krahasua me atë të Ashley Cole kundër Ronaldos në Euro 2004.
Wayne Rooney tha:
“Cucurella ishte i pabesueshëm. Ndoshta paraqitja më e mirë që kam parë nga një mbrojtës i majtë prej shumë kohësh.”
