Këngëtari i njohur Shpat Kasapi ndërroi jetë papritur në moshën 40-vjeçare, një lajm që tronditi familjarët, miqtë dhe fansat e tij. Kasapi ishte në Itali me gruan dhe djalin e tij 4-vjeçar për një kontroll mjekësor kur ndjeu një dhimbje të fortë në orët e vona të së martës.
Pavarësisht ndihmës së parë mjekësore që iu dha në banesë, ai nuk arriti të mbijetojë. Vëllai i tij,
Albini, tha se shkaku i vdekjes dyshohet të jetë një arrest kardiak, dhe shpërtheu në emocione duke shpresuar se ky lajm do të ishte një gabim.
Ai pohon se Kasapi kishte pasur disa shqetësime të vogla me zemrën, por asgjë serioze.
Shpat Kasapi lindi më 1 maj 1985 në Tetovë, Maqedoninë e Veriut, dhe gjatë karrierës së tij muzikore u bë një nga emrat më të njohur në zhanrin pop folk.
Ai e filloi karrierën muzikore në fëmijëri, duke fituar çmimin e parë në festivalin “Bletëzat 98” në moshën 13-vjeçare. Më pas, ai vazhdoi të shkëlqejë me pjesëmarrjet në festivale si “Këngët e Stinës 2002” në Tiranë, “Nota Fest 2003” dhe “Albafest 2003”, ku fitoi çmime të rëndësishme.
Gjatë karrierës, Kasapi dhe publikun e tij e gëzoi me disa albume të suksesshme si “Tash po Kthehesh,” “Medikament,” “Axhamiu,” dhe “Do të vijë një ditë.”
Ai do të mungojë jo vetëm për familjen dhe miqtë e tij, por edhe për skenën shqiptare dhe ndjekësit e shumtë të muzikës së tij.
Aktualisht, trupi i tij qëndron në Itali, dhe priten procedurat për kthimin e tij pranë familjarëve. Vdekja e Shpat Kasapit lë një boshllëk të thellë në botën e muzikës dhe në zemrat e atyre që e njohën dhe e donin atë.
