Edhe pse kanë kaluar vetëm dy ditë nga normalizimi i situatës, pasojat e përmbytjeve janë ende të dukshme. Rreth banesave ende ka prani uji, ndërsa janë regjistruar jo pak dëme materiale.
Banorë të komunitetit rom, vazhdojnë të jetojnë mes frikës dhe pasigurisë, pasi sipas tyre çdo reshje intensive rrezikon përmbytje për ta.
Ata tregojnë se u detyruan të largohen përkohësisht te të afërmit dhe u kthyen sapo uji është tërhequr, por kërkojnë një zgjidhje përfundimtare.
Përmbytjet kanë përfshirë disa hektarë tokë bujqësore të mbjellë me bar për bagëti, si dhe rreth 14 banesa.
Banorët e Novoselës shprehen se çdo vit përballen me të njëjtin problem, duke u detyruar të largojnë bagëtinë dhe të ngrejnë orenditë e shtëpive për të shmangur dëmet nga uji. Banorët kanë nisur pastrimin e dëmeve, ndërsa disa prej tyre janë detyruar të lëvizin në zonat e përmbytura me mjete të improvizuara lundruese.
“Kemi një javë, qëkur doli Vjosa. Morëm gjithçka që kishim, ikëm të tmerruar. Tani po rrimë te të afërmit tanë. Asnjë ndihmë nuk na kanë dhënë. Kemi frikë…uji është tërhequr por kemi frikë të hyjmë në shtëpi. Jemi lagështirë aty”, thotë një banore.
Niveli i ujit në lumin Vjosa, në ditën e gjashtë, ka zbritur në 4.2 metra nga kulmi prej 8.3 metrash të arritur më herët.
Edhe komuniteti rom në zonë pohon se këtë herë përmbytjet kanë qenë më të vogla, por theksojnë se gjatë gjithë këtyre viteve nuk kanë marrë asnjë ndihmë nga institucionet.
“Kemi tre ditë të izoluar. Nuk na erdhi njeri të nathoshte do një bidos ujë. As ujë, as bukë. Vetëm ujë brenda në shtëpi. Jam në mes të pyllit”, thotë banorja.
Ndërkohë, tre banesat pranë urës së Mifolit kanë nisur pastrimin e ambienteve të mbuluara nga balta dhe llumi i tërhequr nga përmbytjet.
