Ministri i Brendshëm, Ervin Hoxha ka reaguar pas kaosit të krijuar ditën e djeshme në Kuvend nga opozita.
Ministri Hoxha e quajti një akt vandalizmi sjelln e opozitës, e cila ditën e djeshme dogji kareriget dhe sulmoi fizikisht disa përfaqësues të mazhorancës.
Ai paralajmëroi se ngjarja do t’i referohet SPAK-ut.
Ervin Hoxha: Flakët e zjarrit, pasditen e djeshme, në dyert e Kuvendit të Shqipërisë, që është tempulli më i lartë i një sistemi demokratik, janë akt që përdhos ndjenjat e qytetarëve të këtij vendi. Kuvendi mbetet thelbi i shprehjes së vullnetit dhe besimit të votuesve, ndaj çdo akt vandalizmi brenda apo në dyert e tij, është absolutisht i papranueshëm dhe i ndëshkueshëm ligjërisht.
Pengimi i ushtrimit të funksioneve kushtetuese
Heqja me dhunë e të drejtës së fjalës
Goditja për shkak të detyrës
Rrezikimi i jetës së deputetëve duke i goditur me mjete te forta
Shkatërrimi me zjarr i pronës publike, ishin akte të rënda dhune dhe vandalizmi.
Në Parlament nuk vihet me shishe benzine, por për të ushtruar lirinë e të drejtës së fjalës mbi bazën e mandatit që merr nga zgjedhësit.
Zjarrvënia, por dhe aktet e tjera të dhunës gjatë seancës parlamentare, ishin vendngjarje për organet ligjzbatuese.
Policia e Shtetit dhe Garda e Republikës kanë kryer menjëherë të gjitha veprimet procedurale, duke administruar pamjet filmike dhe çdo element tjetër me interes për hetimin. Ngjarja do të referohet në përfundim të këtyre veprimeve, në Prokurorinë e Posaçme (SPAK), për shkak të cilësive të veçanta, që kanë deputetët.
Deputetët e Partisë Demokratike nxorrën jashtë sallës së Kuvendit karriget e tyre dhe u vunë zjarrin në shenjë proteste ndaj burgosjes së deputetit Ervin Salianji, dhe, siç u shprehën ata, ndaj shumë akteve të tjera arbitrare të shumicës ndaj opozitës dhe lirive demokratike në vend. Deputeti Flamur Noka paralajmëroi se kjo do të jetë panorama në të gjitha seancat plenare.
