Barcelona nisi me festë rikthimin në shtëpinë e saj historike, teksa mposhti bindshëm 4–0 Athletic Bilbaon në një ndeshje që dominoi nga fillimi deri në fund.
Vetëm 4 minuta pas fillimit, Robert Lewandowski zhbllokoi rezultatin me një gol të shpejtë, duke ndezur entuziazmin e më shumë se 45 mijë tifozëve të rikthyer në Spotify Camp Nou. Në fund të pjesës së parë, Ferran Torres, pas një aksioni të bukur me Lamine Yamal, dyfishoi avantazhin (45’+3).
Pjesa e dytë nisi përsëri vrullshëm: Fermin López realizoi golin e tretë në minutën e 48’, duke e bërë ndeshjen të pamundur për mysafirët. Athletic Bilbao mbeti me një lojtar më pak pas daljes me karton të kuq të Sancet (54′), duke e bërë edhe më të lehtë dominimin e katalanasve.
Në minutën e fundit të takimit (90’), Ferran Torres vulosi rezultatin 4–0, sërish me asistim nga Lamine Yamal, i cili shkëlqeu gjatë gjithë ndeshjes.
Një rikthim perfekt në Camp Nou: lojë e bukur, atmosferë elektrizuese dhe një fitore e thellë që kthen besimin dhe emocionet e tifozëve blaugrana.
