Ish-deputetja e Lëvizjes Vetëvendosje, Arjeta Fejza, shprehet se vota e qytetarëve në zgjedhjet e ardhshme do të ketë rëndësi kritike për krijimin e një Kuvendi funksional. Ajo thekson se vetëm një Lëvizje Vetëvendosje e fortë, me numër të mjaftueshëm deputetësh, mund ta sigurojë këtë stabilitet. Në një intervistë për “60 Minuta” të KTV-së, Fejza shpreh besimin se qytetarët do të shkruajnë një rezultat pozitiv për partinë e saj në zgjedhjet e parakohshme të 28 dhjetorit.
Duke komentuar situatën politike që ka çuar vendin në zgjedhje të reja, ajo akuzon opozitën për bllokimin e proceseve dhe dështimin e mandatarit të dytë. Fejza thekson se çdo alternativë që Lëvizja Vetëvendosje ka ofruar është hasur në kundërshtimin e opozitës, përfshirë LDK-në dhe Nismën. Sipas saj, VV ka bërë përpjekje të vazhdueshme për të gjetur zgjidhje dhe për të dalë nga ngërçi politik, por opozita është ajo që e mban barrën e mosfunksionimit të Kuvendit.
Ajo e përmend se zgjedhjet nuk kanë qenë opsioni i parë për VV-në, por tani ato paraqesin një mundësi që qytetarët të zgjedhin për një Kuvend që funksionon. Fejza beson se këto zgjedhje do të jenë kritike për të ardhmen e vendit dhe se Lëvizja Vetëvendosje do të ketë mbështetje të fortë nga populli.
Kur pyetet për mundësitë e skenarëve paszgjedhorë dhe situatat hipotetike, ajo thekson se është ende herët të flasë për koalicione, duke shprehur optimizëm për faktin se VV do të arrijë të sigurojë numra të mjaftueshëm për të qeverisur e vetme. Fejza e përmbyll intervistën duke theksuar angazhimin maksimal të partisë për të komunikuar me qytetarët dhe për t’i dëgjuar ata përmes procesit zgjedhor.
