Dita Botërore e Fëmijëve dhe 30-vjetori i UNICEF-it në Kosovë janë shënuar në një konferencë ku janë bashkuar individë që kanë kontribuar në mbrojtjen dhe fuqizimin e fëmijëve.
Pjesmarrësit ndanë përvoja dhe rrëfime personale, duke shpjeguar sfidat dhe sukseset e organizatës në Kosovë.
Gjatë këtyre tri dekadave, UNICEF-i ka investuar kryesisht në arsimin, shëndetësinë dhe mbështetjen për të rinjtë dhe fëmijët.
Veronika Vashchenko, shefe e UNICEF-it në Kosovë, ndau momente emocionuese nga vizitat në terren, përfshirë një takim me fëmijë rom, ashkali dhe egjiptian në fshatin Brekoc.
Ajo theksoi rëndësinë e edukimit, duke cituar një baba që shprehte dëshirën për një jetë më të mirë për fëmijët e tij.
Flaka Surroi, pronarja e KOHË-s dhe punonjësja e parë e UNICEF-it në Kosovë, ndau kujtime nga vitet e luftës, kur ekipi i saj punonte nën kushte të vështira dhe me rrezik për jetën.
Ajo përshkroi sfidat e përditshme në fushë, përfshirë kërcënimet dhe arrestimet, por gjithmonë me vendosmëri për të ndihmuar nënat dhe fëmijët.
Gjatë konferencës, u shfaqën gjithashtu videomesazhe nga bashkëpunëtorët e UNICEF-it, duke ndarë emocionin e punës së tyre.
