Instituti i Kosovës për Drejtësi (IKD) ka shprehur shqetësim për nivelin e lartë të parregullsive kushtetuese dhe procedurale në legjislaturën e nëntë të Kuvendit të Kosovës.
IKD vlerëson se seanca e thirrur nga deputetët e Vetëvendosjes për shqyrtimin e projektbuxhetit të vitit 2026 dhe financimin e RTK-së, është në shkelje të Kushtetutës.
Sipas IKD, thirrja e një seance të tillë para seancës për votimin e Qeverisë është në kundërshtim me ligjet dhe rregulloret parlamentare.
IKD thekson se formimi i komisioneve parlamentare para votimit të Qeverisë cënon demokracinë dhe rendin kushtetues të vendit.
Procedura e formimit të komisioneve, sipas legjislacionit, duhet të ndodhë pas formimit të Qeverisë, që do të mundësojë një balancë të qartë politike mes qeverisë dhe opozitës.
Në këtë situatë të paqartë politike, instrumentet mbikëqyrëse si Komisioni për Mbikëqyrjen e AKI-së dhe ai për Financat Publike i takojnë opozitës. Sidoqoftë, pa një qeveri të formuar, nuk dihet se cili subjekt do të përfaqësojë opozitën.
Sot priten dy seanca në Kuvendin e Kosovës, njëra për shqyrtimin e çështjeve të rendit të ditës dhe tjetra për votimin e Qeverisë së propozuar nga mandatari Glauk Konjufca.
Partitë opozitare si PDK, LDK, AAK dhe NISMA kanë shpallur se nuk do të marrin pjesë në seancën e parë.
IKD rekomandon thirrjen e një takimi politik mes të gjitha partive para seancës së votimit të Qeverisë, me qëllim të arritjes së një marrëveshjeje për krijimin e një Qeverie teknike.
Kjo do të ndihmonte në adresimin e çështjeve urgjente, si buxheti për vitin 2026. Sipas IKD-së, vetëm një marrëveshje politike do të mund të rikthejë legjitimitetin dhe rregullsinë procedurale, përndryshe vendi rrezikon një krisje të thellë të rendit kushtetues dhe funksionimit të demokracisë parlamentare.
