Ministri i Mbrojtjes, Pirro Vengu, i shoqëruar nga prefekti Tauland Malshi, zhvilloi një takim me Shtabin e Emergjencave në Lezhë për të shqyrtuar situatën e reshjeve të fundit dhe masat që do të merren në orët në vijim. Pas mbledhjes, Vengu theksoi se situata është dinamike dhe se struktura emergjente janë aktivizuar maksimalisht, duke kërkuar mjete shtesë për të përballuar situatën.
Forcat e ushtrisë janë dislokuar në zonat më të prekura, përfshirë Kurbin dhe Lezhë, me synimin për të parandaluar përkeqësimin e situatës. Ndërkohë, janë ndërmarrë masa për të riparuar tre ura që kanë pësuar dëmtime të konsiderueshme. Në Bashkinë e Lezhës, janë evakuuar katër familje që janë strehuar në konviktin e shkollës profesionale. Një shqetësim i veçantë është evidentuar në lagjen “Sake”, ku disa banoja janë në rrezik, por çdo ndërhyrje do të kërkojë miratimin e Ministrisë për shkak të statusit të zonës.
Situata është kritike edhe në Kallmet, ku rezervuari ka arritur kapacitetin maksimal. Probleme janë raportuar gjithashtu në Dragushë dhe Dajç, ku kanalet e ujërave të larta mund të shkaktojnë përmbytje nëse reshjet vazhdojnë. Në Kurbin, një familje u evakuua nga fshati Gjorm, ndërsa në Mirditë situata është më e qetë, me disa rrëshqitje dhe bllokime nga inerte në rrugët rurale.
Drejtoria Rajonale e Ujitjes dhe Kullimit njoftoi se hidrovoret po punojnë me kapacitet të plotë, ndërsa mbikëqyrja e kanaleve kulluese në Kurbini dhe Zadrimë është intensifikuar. OSHEE raportoi për ndërprerje të energjisë elektrike, por furnizimi është rikthyer menjëherë pas ndërhyrjeve teknike.
Policia e Lezhës ka shtuar patrullimet në akset me rrezik për të kufizuar qarkullimin dhe për të siguruar mbarëvajtjen e lëvizjes. Ministri Vengu insistoi në nevojën për vazhdimin e gatishmërisë së plotë të të gjitha strukturave, pasi reshjet parashikohen të vazhdojnë.
