Alice dhe Ellen Kessler, binjaket e njohura të botës së argëtimit, ndërruan jetë në moshën 89 vjeçare. Sipas mediave gjermane, ato, të lindura më 20 gusht 1936 në Saksoni, kanë zgjedhur eutanazinë e asistuar, një proces të lejuar në Gjermani vetëm në kushte të veçanta.
Të njohura për shumë vite si këngëtare, valltare dhe artiste multifunksionale, Kessler u bënë të famshme që në vitin 1959, duke fituar pseudonimin “këmbët e kombit” për shkak të paraqitjes së tyre mbresëlënëse në skenë.
Dëshira e motrave ishte që të mbeteshin “të pandashme edhe në vdekje,” dhe ato do të varrosen së bashku në një urnë, pranë hirit të nënës së tyre, Elsa, dhe qenit të tyre, Yello. Pas vdekjes së tyre, policia konfirmoi se nuk kishte elemente kriminale që ndërlidheshin me ngjarjen.
Në vitin 2012, Kessler kanë folur publikisht për dëshirën e tyre për eutanazi, duke shprehur se, nëse njëra prej tyre do të binte në gjendje vegjetative, tjetra do ta ndihmonte për të mos vuajtur.
Ligji gjerman kërkon që personi të veprojë me vullnet të lirë dhe në plotësinë e mendjes, dhe “eutanazia aktive” mbetet e ndaluar.
Karriera e binjakëve arriti kulmin në Itali pas zhvendosjes në vitin 1961, ku paraqitjet e tyre në programet popullore si “Giardino d’inverno” dhe “Studio Uno”, me këngën e njohur “Da-da-un-pa”, i shndërruan në një fenomen kulturor të viteve ’60.
Në vitin 2006, ato vendosën të dhuronin të gjithë pasurinë e tyre për organizatën humanitare “Mjekët pa Kufij”, duke shprehur se ka shumë njerëz në botë që kanë nevojë për donacione.
Vdekja e Alice dhe Ellen Kessler shënon një pikë kthimi për botën e skenës europiane, duke i lënë pas një trashëgimi të pasur në artin dhe argëtimin. Me këtë humbje, mbyllet një epokë për dy nga ikonat më të mëdha të kulturës europiane.
