Gjykata në Australi po shqyrton një nga rastet më tronditëse të vrasjes në Queensland, atë të Toyah Cordingley, 24 vjeçe, e cila u gjet e vrarë dhe e varrosur në një varr të cekët në plazhin e izoluar Wangetti në vitin 2018.
Sipas akuzës, 41-vjeçari Rajwinder Singh e ka goditur viktimën me një objekt të mprehtë para se ta varroste. Singh mohon akuzat. Ai u arrestua katër vjet më vonë, pasi ishte larguar me nxitim drejt Indisë, duke braktisur gruan dhe tre fëmijët.
Prokuroria theksoi se provat circumstantiale dhe gjurmët e ADN-së të gjetura në vendngjarje e lidhin Singh me krimin me një probabilitet 3.8 miliard-për-një krahasuar me çdo person tjetër të rastësishëm.
Jurorët vizituan plazhin Wangetti për të parë vendin ku u gjet trupi i Cordingley, ndërkohë që gjyqtari dhe avokatët ishin të pajisur me veshje të përshtatshme për klimën tropikale. Vizita shërbeu vetëm për orientim, pa paraqitur prova të reja.
Detaje të tjera të rënda u rikujtuan në gjykatë: Cordingley ishte gjetur me bikini, ndërsa sendet e saj personale mungonin, çka mund të ketë qenë një përpjekje për të shmangur identifikimin. Qeni i saj, Indie, u gjet i lidhur në një pemë pranë vendit ku ishte varrosur trupi.
Avokati i mbrojtjes, Greg McGuire, e përshkroi Singh si “njeri paqësor dhe prind të përkushtuar”, duke pretenduar se ai ishte në vendin e gabuar në kohën e gabuar. Mbrojtja përmendi edhe një deklaratë të Singh ndaj një agjenti të infiltruar, ku ai pretendonte se kishte parë dy burra të maskuar që sulmuan Cordingley dhe ishte larguar i frikësuar.
Ditët në vijim pritet të dëshmojnë dëshmitarë të tjerë kyç, përfshirë të dashurin e viktimës, Marco Heidenreich, i cili është përjashtuar nga lista e të dyshuarve. Procesi gjyqësor do të vazhdojë në sallën e zakonshme të gjykatës.
