Në GJKKO zhvillohet sot seanca paraprake për dy nga çështjet më të rëndësishme të momentit: dosjen ndaj Ilir Metës, Monika Kryemadhit, nënës së saj Fatime Kryemadhi, Pirro Xhixhos dhe Ema Çokut, si edhe dosjen ndaj kryebashkiakut të Tiranës Erion Veliaj, bashkëshortes së tij Ajola Xoxa dhe 28 personave e shoqërive të tjera.
Seanca e mëparshme për çështjen e Metës u shty pasi avokati i tij, Kujtim Cakrani, kërkoi përjashtimin e gjyqtares Irena Gjoka duke pretenduar konflikt interesi, pasi sipas tij Gjoka po hetohet nga SPAK mbi një dënim të fshehur në Greqi.
Ndërkohë, sot mbahet edhe seanca paraprake për dosjen e “Veliajt”, ku në seancën e kaluar prokurori Altin Dumani paraqiti një material të përmbledhur prej 50 faqesh dhe kërkoi kalimin e çështjes për gjykim.
Avokatët e disa të pandehurve kërkuan pushimin e çështjes ose gjykim të shkurtuar, ndërsa vetë Veliaj ka kërkuar një kopje fizike të dosjes pasi, siç pretendon, në paraburgimin e Durrësit nuk ka mundësi të përdorë USB-në që i është dorëzuar.
Ai akuzohet për pastrim parash, mosdeklarim pasurie, korrupsion pasiv në 9 episode, shpërdorim detyre dhe futje të sendeve të ndaluara në qeli, ndërsa Ajola Xoxa akuzohet për mosdeklarim pasurie, fshehje të të ardhurave dhe pastrim parash.
Ish-deputetja Klotilda Bushka akuzohet për veprime që pengojnë zbulimin e së vërtetës.
Më 3 nëntor, Gjykata Kushtetuese la në fuqi mandatin e Veliajt si kryebashkiak të Tiranës, duke rrëzuar vendimin e qeverisë për shkarkimin e tij. Sot pritet që GJKKO të vendosë nëse të dyja dosjet do të kalojnë për gjykim
