Një 39 vjeçar shqiptar, i identifikuar si Dranoel Ndoja, është arrestuar nga Policia në Itali pasi akuzohet si koka e një grupi kriminal droge.
Sipas mediave të huaja, Ndoja besohet të jetë truri i organizatës kriminale të trafikut të drogës në qendër të Operacionit “Wind Rose”, (Trëndafili i egër) i cili mori emrin nga tatuazhi i trëndafilit në qafën e Ndojës.
“Karabinierët nga stacioni i Castelraimondo-s, në bashkëpunim me kolegët e njësisë operative të kompanisë Camerino, të udhëhequr nga Kapiten Angelo Faraca, gjurmuan dhe arrestuan 39-vjeçarin, banor i Gagliole, por kohët e fundit nën arrest shtëpiak në Civitanova. Ai po vuan dënimin e mbetur për posedim dhe trafikim droge”, informuan autoritetet italiane.
Por duket se parvarësisht arrestit shtëpiak, ai ka vijuar aktivitetin e tij dhe ishte rishpallur në kërkim. Teksa tani ishte dënuar në mungesë edhe me burg, që duhet ta vuajë.
Arrestimi përfundon hetimin “Rosa dei Venti”, i cili midis viteve 2017 dhe 2018 çoi në arrestimin e tre personave, përfshirë shqiptarin, i konsideruar si kreu i organizatës kriminale. Ai çoi gjithashtu në dy akuza të ngritura në gjendje të lirë, tridhjetë individë të raportuar si përdorues dhe sekuestrimin e pak më shumë se katër kilogramëve narkotikë, përfshirë marihuanë, hashash dhe kokainë.
Hetimi filloi me zbulimin e një sasie të madhe narkotikësh në një qese të braktisur brenda stacionit të trenit Gagliole. Prej andej, karabinierët zbuluan një biznes të lulëzuar me pakicë droge, së bashku me pika shpërndarjeje droge dhe ambiente magazinimi.
Nëntë burra u nxorën në gjyq me akuza për trafik droge, aktivë kryesisht në Castelraimondo, Camerino, San Severino, Tolentino, por edhe në Gagliole, Belforte dhe Serravalle, dhe në raste të caktuara edhe përgjatë bregdetit, informon media.
39-vjeçari shqiptar tani duhet të vuajë dënimin e mbetur prej 6 vjetësh, 10 muajsh dhe 18 ditësh burg, siç përcaktohet nga dënimi përfundimtar. Pas formaliteteve të zakonshme në kazermë, 39-vjeçari u dërgua në burgun e Fermos.
