Një përplasje e fortë është ndodhur mes presidentit amerikan Donald Trump dhe kongresmenes republikane Marjorie Taylor Greene, që shënon një ndarje të mundshme në aleancën e tyre të gjatë. Konflikti shpërtheu me Trumpin që e quajti Greene “të çmendur” në postimet e tij në rrjetet sociale, duke e akuzuar atë se duhej të hiqte dorë nga kanditatura për zgjedhjet e vitit të ardhshëm. Ai e quajti atë madje “tradhtare”, pas kritikave që Greene kishte bërë ndaj tij.
Greene, një mbështetëse e njohur e Trumpit, ka filluar të vë në dyshim angazhimin e tij ndaj politikës “Amerika e Parë”. Ajo ka shprehur shqetësime mbi menaxhimin e tij mbi dosjet e Jeffrey Epstein dhe ka kritikuar politikën e tij në lidhje me kostot për votuesit si dhe vendimet për konfliktet e huaja. Kjo përplasje ndodhi në një moment kur Dhoma e Përfaqësuesve pritet të shqyrtojë publikimin e dosjeve të Epsteinit.
Trump reagoi ashpër ndaj Greene, duke e akuzuar se po ankohej për mungesën e mbështetjes së tij, pas një diskutimi që kishin pasur rreth kandidaturës së saj. Ai e përshkroi si “të çmendur” dhe tha se nuk mund të merret me telefonata nga njerëz “histerikë”. Ai madje shprehu përkrahje për rivalët e Greene në zgjedhjet e ardhshme të mesmandateve. Ndërkohë, Greene reagoi duke shprehur se Trump po e bënte objektiv të kërcënimeve, duke e quajtur atë njeriun më të fuqishëm në botë.
Greene është një nga katër republikanët e Dhomës që iu bashkuan demokratëve për të firmosur një peticion për publikimin e dosjeve të Epsteinit. Ajo theksoi se nuk është e angazhuar për të adhuruar Trumpin, por shërben për popullin amerikan dhe besimin e saj në Zotin. Kjo ndarje ka ngritur shumë pyetje për të ardhmen e marrëdhënies mes Trumpit dhe mbështetësve të tij më të fortë, duke treguar se aleancat politike mund të jenë më të brishta seç duken.
