Kombëtarja e Kosovës ka shënuar një fitore madhore me rezultat 0:2 ndaj Sllovenisë në Lubljanë, duke siguruar matematikisht play-offin për Kupën e Botës 2026.
Që në fillim të ndeshjes, “Dardanët” treguan vendosmëri dhe synim të qartë për tri pikët. Goli i parë erdhi në minutën e 6-të, kur Fisnik Asllani shënoi një gol të bukur, duke vënë Kosovën në epërsi.
Në pjesën e dytë, presioni i ekipit u shpërblye me golin e dytë, pas një autogoli të mbrojtësit slloven Karnicnik, i cili vulosi triumfin historik për Kosovën.
Me këtë fitore, Kosova ngjitet në kuotën e 10 pikëve, duke marrë vendin e dytë në grup dhe duke siguruar play-offin. Zvicra mbetet lidere me tri pikë më shumë dhe, falë golavarazhit, ka siguruar kualifikimin direkt në Botërorin 2026 që do të zhvillohet në SHBA, Meksikë dhe Kanada.
Pas tri ditësh, Kosova do të përballet pikërisht me Zvicrën në stadiumin “Fadil Vokrri” në Prishtinë, në një duel që mbetet me rëndësi për moralin dhe vazhdimësinë e ekipit.
Kosova vazhdon ta shkruajë historinë, ndërsa ëndrra për Botërorin mbetet e gjallë.
