Në prag të ndeshjes ndërkombëtare të futbollit mes Shqipërisë dhe Anglisë, që do të zhvillohet të dielën më 16 nëntor, ora 18:00, në stadiumin “Air Albania”, Policia e Shtetit ka hartuar një plan të detajuar masash për garantimin e rendit dhe sigurisë publike.
Në kuadër të këtij plani, janë marrë masa për shoqërimin dhe sigurimin e ekipit të Anglisë, nga aeroporti deri në hotel dhe stadium, si dhe gjatë kthimit.
Përveç sigurisë së lojtarëve, do të sigurohet rendi publik para, gjatë dhe pas ndeshjes, jo vetëm pranë stadiumit, por edhe në të gjithë qytetin e Tiranës.
Kontrolle të hollësishme do të kryhen në hyrje të stadiumit për të parandaluar hyrjen e sendeve të ndaluara, banderolave me përmbajtje raciste dhe lëndëve piroteknike.
Do të sigurohen rrugëkalimet për shërbimet e emergjencës dhe do të menaxhohet trafiku në zonat përreth stadiumit.
Për këtë arsye, nga ora 14:00 e më pas do të ketë kufizime qarkullimi në rrugët “Papa Gjon Pali II”, “Dervish Hima” pranë ambasadës së SHBA-së, “Asim Zeneli” pranë ambasadës së SHBA-së, “Themistokli Gërmenji”, kryqëzimi i Liceut në rrugën “Ismail Qemali”, rruga “Mustafa Matohiti” pranë shkollës “Kosova”, rruga “Jul Variboba” pranë postës, rruga “Lekë Dukagjini” pranë ish-Gardës së Republikës, rruga “Avdyl Frashëri” pranë kryqëzimit të Librit Universitar, si dhe rrugët “Skerdilajd Llagami” dhe “Faik Konica”.
Policia e Shtetit bashkëpunon ngushtë me Federatën Shqiptare të Futbollit, UEFA-n, Gardën e Republikës, shërbimet e emergjencës dhe ekipin e sigurisë të Anglisë, për të garantuar standarde të larta sigurie.
Hyrja e tifozëve në stadium fillon nga ora 15:00, ndërsa çdo shkelje e ligjit, përfshirë dhunën ose përdorimin e lëndëve piroteknike, do të ndëshkohet sipas Kodit Penal.
Policia apelon për mirëkuptim nga tifozët dhe siguron se qindra punonjës policie do të jenë në dispozicion për çdo ndihmë dhe informacion, me qëllim që ndeshja të përmbyllet pa incidente dhe në mënyrë të sigurt.
