Banorët e fshatit Guri i Bardhë, në njësinë administrative Xibër të Bashkisë Klos, prej muajsh janë pa ujë të pijshëm, pavarësisht se një vit më parë përfundoi ndërtimi i rrjetit të ri të ujësjellësit.
Sipas banorëve, prej muajit maj e deri më sot, nga rubinetat e shtëpive të tyre nuk del asnjë pikë ujë. Ata thonë se, para ndërtimit të ujësjellësit të ri, furnizoheshin normalisht me ujë falë një investimi privat që kishin bërë vetë, por pas ndërhyrjes së re publike, situata është përkeqësuar.
“Këtë ujësjellës e ndërtuan para një viti e gjysmë, por ne si banorë nuk ishim dakord sepse kishim bërë investimet tona. Sot pusetat janë lënë në mënyrë të çrregullt, shkarkimet dalin në rrugë dhe shumë familje me kontratë nuk kanë ujë. Vjen një ditë e s’vjen për një javë,” – shprehet kryeplaku i fshatit.
Edhe banorët e tjerë ndajnë të njëjtin shqetësim.
“Kam bërë kontratë, por ujë nuk kam. Marr në telefon kryeplakun dhe më thotë se s’ka as vetë. Shkarkuesin ma kanë vendosur në rrugë dhe matësin larg shtëpisë. Deputetët vijnë, premtojnë, por asgjë nuk ndryshon,” – thotë një banor tjetër.
Sipas dokumenteve zyrtare, ndërtimi i ujësjellësit ka nisur në prill të vitit 2023, me një vlerë 219 milionë lekë me TVSH, me afat punimesh 12 muaj dhe garanci 2-vjeçare.
Administratori i firmës ndërtuese, Demir Boriçi, tha për Fiks Fare se mungesa e ujit lidhet me ndërhyrjet në linjë dhe përdorimin e ujit për vaditje: “Problemi nisi nga 5 maji, kur filluan vaditjet. Linja është projektuar për 7–8 litra në sekondë, por sasia nuk mjafton. Janë bërë ndërhyrje në ajrus-shkarkues dhe kjo ka sjellë ndërprerje. Ka pasur dëmtime të çelësave që ne i kemi zëvendësuar disa herë. Punimet i kemi dorëzuar dhe jemi brenda garancisë, ndaj ndërhyjmë sa herë ka nevojë.”
Ndërkohë, përgjegjësi teknik i UK Bulqizë, Ajet Braho, konfirmon se ujësjellësi është në garanci dhe në fazë menaxhimi:
“Ka probleme sepse është një rrjet i hapur me shumë puseta dhe depo. Duhet më shumë staf në terren, sepse disa persona ndërhyjnë dhe hapin valvulat. Kemi marrë masa për t’i siguruar.”
Nga ana tjetër, përgjegjësi i linjave të ujësjellësit në UK Dibër, Sami Bruçi, deklaron se është konstatuar një lidhje e paligjshme në linjën kryesore, e cila pengon furnizimin me ujë:
“Do të ndërhyjmë që të garantojmë furnizimin e rregullt për të gjithë banorët.”
Në fund, banorët shpresojnë që pas ndërhyrjes së institucioneve, fshati i tyre të ketë më në fund ujë të pijshëm.
“Faleminderit Fiks Fare, shpresojmë që këtë herë problemi i ujit të zgjidhet përfundimisht,” – tha kryeplaku i fshatit.
