Turqia zhvilloi një ceremoni funeralike të premten për 20 ushtarët që humbën jetën në një aksident ajror në Gjeorgji më herët gjatë javës.
Familjarë, zyrtarë dhe ushtarë të tjerë nderuan kujtimin e tyre përpara 20 arkivoleve të mbuluara me flamurin kombëtar në një bazë ajrore në kryeqytetin Ankara. Pas ceremonisë, të ndjerët u transportuan në qytetet e tyre për varrim.
Avioni C-130 ushtarak po fluturonte nga Azerbajxhani drejt Turqisë kur pësoi rrëzim në komunën Sighnaghi të Gjeorgjisë, afër kufirit me Azerbajxhan, ditën e martë.
Ende nuk dihen shkaktarët e këtij aksidenti, dhe Turqia ka dërguar menjëherë një ekip hetimor për të zbuluar arsyet pas këtij incidenti. Të dhënat e fluturimit dhe regjistruesit e zërit të avioni po shqyrtohen në Ankara, sipas Ministrisë së Mbrojtjes Kombëtare.
Ministria konfirmoi se nuk kishte municion në bord kur avioni u rrëzua. Viktimat përfshinin anëtarë të ekuipazhit dhe ushtarë që ishin përgjegjës për mirëmbajtjen dhe riparimin e avionëve ushtarakë F-16 turk, të cilët ishin fluturuar në Azerbajxhan për të pjesëmarrë në festimet e Ditës së Fitores të atij vendi.
Si masë paraprake, ushtria turke ka pezulluar përkohësisht fluturimet e avionëve të tjerë C-130 deri në përfundimin e inspektimeve teknike.
Avionët C-130 janë përdorur gjerësisht nga forcat e armatosura të Turqisë për transporte personeli dhe operacione logjistike.
